Euskal Autonomia Erkidegoan industria-produkzioa %0,2 jaitsi da 2025eko otsailean, aurreko urteko hilabete berarekin alderatuta. Hala ere, urtarrilaren aldean jarduerak %0,4ko hazkundea izan du, hilez hileko joera zertxobait positiboa erakutsiz. Lurraldeka, jaitsiera izan da Araban (%6,1) eta Gipuzkoan (%0,7), baina Bizkaian igoera erregistratu da, %3,6koa.
Eustatek atzo argitaratu zituen datuek diotenez, ondasunen helburu ekonomikoaren arabera kontsumo-ondasunen ekoizpena %3,4 murriztu da, batez ere kontsumo ez-iraunkorrekoen jaitsieragatik (%4,6). Aldiz, kontsumo iraunkorreko ondasunek %1,3 egin dute gora. Ekipo-ondasunen produkzioak %2,7ko hazkundea izan du, baina bitarteko ondasunak %1,7 jaitsi dira. Energiaren ekoizpena, berriz, %1,9 handitu da urte arteko konparazioan.
Beherakada nabarmenagoa Nafarroan
Nafarroan, industria-produkzioaren beherakada askoz nabarmenagoa izan da INEren arabera: %8,3koa urte arteko datuetan. Sektoreka aztertuta, kontsumo-ondasunen ekoizpena %2,0 igo da, batez ere kontsumo ez-iraunkorrekoen gorakadari esker (%6,5). Hala ere, kontsumo iraunkorreko ondasunek beherakada handia izan dute, %55,4koa.
Gainerako kategorietan ere atzerakada nagusitu da Nafarroan. Ekipo-ondasunen ekoizpena %17,6 jaitsi da, eta bitarteko ondasunek %7,2ko beherakada izan dute. Energiaren produkzioak ere behera egin du, %1,6 gutxiago ekoitzi baita aurreko urteko otsailarekin alderatuta.