INE estatistika erakundeak emandako datuen arabera, Nafarroako industriak %1,5 egin zuen atzera urrian, nahiz eta aurreko hilaren aldean produkzioa %2,2 handitu zen. Sektoreen arteko portaera oso desberdina izan zen: kontsumo iraunkorreko ondasunen produkzioa %33,7 jaitsi zen aurreko urtearen aldean, eta ekipo ondasunena %14,1. Kontsumo ondasun ez-iraunkorren produkzioa, aldiz, %3,3 hazi zen urte artean, eta bitarteko ondasunena %0,8.
Euskal Autonomia Erkidegoan ere, adierazleak %0,3ko beherakada orokorrarekin itxi zuen hilabetea, nahiz eta irailaren aldean industria produkzioan %9,1eko gorakada izan. Kontsumo ondasunek izan zuten urte arteko igoerarik handiena (%3,2), kontsumo ondasun iraunkorrek batez ere (%9,1). Kontsumo ondasun ez-iraunkorrek ere %1,7 egin zuten gora; kontrara, bitarteko ondasunek %1,0 egin zuten behera. Ekipo ondasunen sektorea izan zen zigortuena EAEn, urtean %2,5 jaitsi baitzen produkzioa, nahiz eta irailean baino %12,3 gehiago ekoitzi.