AENAk eskainitako datuen arabera, aurtengo uztailean 690.201 pertsona igaro dira Loiuko aireportutik, inoizko bidaiari gehien hain zuzen (2024an baino %0,6 gehiago). 2025eko lehen zazpi hilabeteetan, 3,98 milioi bidaiari hartu ditu aireportuak, iazko epe berean baino %3,6 gehiago.
Uztailean, bidaiari kopurua handitu bada ere, hegaldi kopuruek behera egin dute. Denera 4.993 aireratze eta lurreratze operazio izan dira Bizkaiko aireportuan, iazko uztailean baino %3,2 gutxiago.
Forondako aireportuan, aurreko urteetako uztaileko datuekin alderatuta, %0,6 bidaiari gutxiago izan dira: 27.450. 1.334 aireratze eta lurreratze egin dira, iazko epe berean baino %3,3 gutxiago. Halaber, 6.358 tona karga mugitu ziren Gasteizko aireportuan, iazko uztailean baino %3 gehiago.
Hondarribiko aireportuan ere bidaiari kopuruak behera egin du. 47.790 bidaiari hartu ditu Gipuzkoako aireportuak, iazko uztailean baino %5,4 gutxiago. Denera 682 hegaldi kudeatu dira uztailean, 2024ko hilabete berean baino %6,1 gehiago.
Azkenik, Noaingo aireportuan 816 aireratze eta lurreratze egin dira, iazko uztailean baino %50 gehiago. Bidaiari kopuruari dagokionez, 20.000 pertsonako langa gainditu du.