Irango eta inguruko herrialdeetako ezegonkortasuna kezka eragiten ari da Gipuzkoako enpresa-sarean. Adegiren azken inkestaren arabera, enpresen %29,6k uste du egoerak eragin “handia” edo “oso handia” duela beren jardueran, eta %41,5ek aitortu du eragin “ertaina” izan duela.
Eraikuntza da testuinguru horren ondorioak gehien salatzen dituen sektorea; izan ere, eraikuntza enpresen %78k adierazi du eragina handia edo oso handia dela. Industrian, ehuneko hori %34koa da, baina industria ez-metalikoaren kasuan, %75era igotzen da. Zerbitzuek erresilientzia handiagoa erakusten dute, sektoreko enpresen %15,5ek baino ez baitu eragin larria jasaten.
Atzemandako ondorio nagusien artean, nabarmentzekoak dira lehengaien eta horniduren kostuen igoera, merkatuen ziurgabetasuna, energiaren garestitzea eta eskariaren gaineko ondorioak. Lehenengo faktorea da eragin handiena izan duena, inkestatutako enpresen %60,5i eragiten baitio. Eraikuntzan, arazo hori dute konpainien %100ek, eta industrian, %71,5ek.
Merkatuen ziurgabetasunak enpresen %44 kezkatzen du; energia-kostuen igoerak, berriz, %39,5 eta eskariaren gaineko eraginak %34,5. Gainera, eragin txikiagoa izan badute ere, hornikuntza-arazoak, nazioarteko garraioan zailtasunak eta proiektuen atzerapenak edo bertan behera uzteak ere salatu dituzte enpresek.