Ja(ki)tea elkartearen eskutik Euskal Sukaldaritza Tradizionalaren lehen kongresua ospatu dute Saran (Lapurdi) astelehen honetan. Maiz bigarren mailan kokatu den sukaldaritza bizitzeko moldea dela erakutsi nahi izan dute Euskal Herri osoko ekoizleak eta sukaldariak elkartuz. Bi aldeen arteko harremanak sendotu nahi izateaz gain, hamasei urte dituen taldeak sektorearen azterketa zehatza egin nahi luke.
“Guk, sukaldariek, nekazariekin batera lan egin behar dugu. Orain jatetxe asko ixten ari da, sektorea aldatzen ari da. Etxeko eguneko menuak egiten dituztenak goraipatu behar ditugu, hori gure nortasunaren ikur handienetakoa da eta”, adierazi du Xabier Zabaletak, Donostiako Aratz jatetxeko sukaldariak eta Ja(ki)tea elkartearen presidenteak.
Xabier Zabaleta (Aratz): “Guk, sukaldariek, nekazariekin batera lan egin behar dugu. Orain jatetxe asko ixten ari da, sektorea aldatzen ari da”
Lehen kongresuaren arrakasta kontuan hartuz gisa horretako topaketa urtero antolatzea hitz eman du Ja(ki)teak, urte batez Ipar Euskal Herrian eta hurrengoan hegoaldean. Catherine Marchand gastronomia kazetariak dio zaletasun handia sumatu dela lehen topaketan profesional guztiak ados direlako elkarlana segitu eta indartzeko. Izan ere, denek ikusten dute arazo berak jasaten dituztela: lan ordutegiak, langile eskasa, beren formakuntza eta aprendizgoa. “Bizi garen tokien arabera ez da beti erraza tokiko ekoizleak aurkitzea. Nahi ditugun hornitzaileak ez dauzkagu beti etxe ondoan”, zehaztu du Marchandek. Gainera, bere hitzetan, sektoreari ospea eman behar zaio berriz gazteak erakartzeko.
Euskal Sukaldaritza Tradizionalaren lehen kongresuaren hiru mahai-inguruen ondoan merkatu txiki bat ere egon da, Euskal Herri osoko zenbait ekoizlekin. Bizkaiko Putxeraren Kofradiaren ondoan, Jef Beredek fruituekin egindako erreximenta-mermeladak edo Beñat Ezkurraren ardi gasna erakutsi dituzte. Battitt Laborde Sarako alkatearen arabera, Ja(ki)tea elkartearen ekimena interesgarria da. “Zentzu osoa du laborantza herri batean egitea lehen topaketa hori. Arrunt errealitateko gaiak aipatu ditugu kongresu honetan eta elkarlana gustatu zaigu”, adierazi du nekazaria ere den hautetsiak. Egun osoan, usai, kolore eta zapore askoren artean, euskara gaztelania eta frantsesarekin nahasi egin da etengabe.
Jakoba Errekondo: "Gurea bezalako lurralde batean, etorkizun bakarra hori da. Astakeria da nekazaritza industrialaren alde aritzea”
Jakoba Errekondo agronomo gipuzkoarrak ere begi onez ikusi du Ja(ki)tea elkartearen ekimena. Rikardo Arregi saria emango diotela eta, irria ezpainetan zeukan Saran egindako agerraldian. Bere hitzetan, elkarlanean sartuz gero dena baikorra da, eta hori da dagoen bide bakarra. “Elkarlana sustatu behar dugu sukaldarien, laborarien, arrantzaleen, eta ekoizleen artean. Gauza bera hautetsi, teknikari eta administrazioekin. Aliantza handia sortu behar dugu, hori da guk transmititu behar duguna. Gurea bezalako lurralde batean, etorkizun bakarra hori da. Astakeria da nekazaritza industrialaren alde aritzea. Gure ildoan sartzen ez dena, bereak egin du”, bota du Errekondok.
Battitt Laborde Sarako alkateak ere argi dauka : “sukaldaritzak dohai handiak ditu jendea elkartzen eta muga faltsu hau gainditzen laguntzen du!”