Eusko Jaurlaritzako Elikadura, Landa Garapen, Nekazaritza eta Arrantza Sailak iragarri du Bermeo eta Ondarroako lonjetan bi izotz fabrika berri eraikiko dituela. Helburua da lonjak eta arraina deskargatzen duten itsasontziak izotzez hornitzea, eraginkortasuna sustatzeko eta sektorearen egungo beharretara egokitzeko.
Amaia Barredo sailburuaren arabera, “instalazio berri hauekin une honetan zaharkituta dagoen zerbitzu bat modernizatzen dugu”. Gaur egungo fabrikak 1978koak dira Bermeon eta 1971koak Ondarroan. Berrikuntza horiei esker, zerbitzuaren kalitatea hobetuko da bi portuetan, arrantzaleen lana erraztuko da eta kontrola, segurtasuna eta energia-eraginkortasuna optimizatuko dira.
Guztira, 6.583.458 euroko inbertsioa egingo da; 3,85 milioi euro Ondarroako lantegira bideratuko dira, eta 2,73 milioi euro, Bermeokora. Lehenengoa maiatzaren hasieran egongo da prest, eta bigarrena, berriz, uztailaren erdialdean martxan jartzea aurreikusten da. Biek izango dituzte ontzi eta kamioientzako automatizazio eta banaketa sistemak, sarbide desberdinetatik.
Bermeoko proiektuak, fabrika Erroxape portualdean dagoen arrantzaleen kofradiaren eraikinera eramango duenak, tokiko nasaren eraldaketaren hasiera markatuko du, Portuko Plan Orokorraren barruan. Ondarroan, fabrika berriaz gain, beste jarduera batzuk ere aurreikusten dira, hala nola, portua dragatzea, Egidazu kaia berrurbanizatzea eta portuko hondakinentzako gune bat sortzea, instalazioak klima-aldaketara egokitzeko eta lehiakortasuna hobetzeko.