Atzo egin zen Bilboko Guggenheim Museoan Euskal Enpresen Gauaren XXXIV. edizioa, Gizarte eta Euskal Fundazioak antolatutakoa.
Bertan, Javier Ormazabal Echevarria Velatiako presidente eta zuzendari exekutiboa izendatu zuten 2024ko Euskal Enpresari Onena. Epaimahaiak nabarmendu zuen Ormazabalek talde horretan egin duen ibilbidea; izan ere, sektore elektrikoan estatuko erreferente izatetik, hogei herrialde baino gehiagotan diharduen konpainia globala izatera pasatu da.
Kutxabankek babestu zuen ekitaldian, Made in Euskadi saria ere eman zioten Gipuzkoako Ampo kooperatibari, balbula industrialetan munduko liderra eta esportazioan erreferentea dena, produkzioaren %95 nazioarteko merkatuetara bideratuz. Bestalde, Danobatgroupek eta Zunibalek Enpresa Berrikuntzaren saria partekatu zuten, industria- eta jasangarritasun-sektoreetan teknologiaren eta ikerketaren alde egindako etengabeko apustuagatik.
Euskal Makila saria Bayer AGri eman zitzaion, Viralgeni, terapia genikoetan espezializatutako Gipuzkoako enpresa bioteknologikoaren hazkundeari emandako laguntzagatik. Saria Viralgen enpresako zuzendari exekutiboak, Jimmy Vanhovek, jaso zuen, Mikel Jauregi Industria, Trantsizio Energetiko eta Jasangarritasun kontseilariaren eskutik, azken horrek eman baitzion itxiera ekitaldiari.
Sari horien bidez, Gizarte eta Euskal Enpresa Fundazioak euskal enpresen berrikuntza, konpromisoa eta nazioarteko proiekzioa nabarmendu nahi izan zituen, horiek baitira enpresen garapen ekonomiko eta teknologikoaren funtsezko zutabeak.