SEA Arabako enpresaburuen elkarteak lan absentismoaren aurkako programa aurkeztu du, Arabako Foru Aldundiaren babesarekin. Gasteizko Jardines de Uleta hotelean egindako jardunaldian aurkeztu dute egitasmoa, zeinetan Ramiro Gonzalez Arabako diputatu nagusia izan den. Bere hitzetan, "lurraldearen lehiakortasuna oztopatzen duen faktore nagusietako bat", da absentismoa.
Gonzalezek gogorarazi du arazo horrek berdin eragiten diela enpresa handi, ertain eta txikiei, produktibitatean, lan-giroan eta enpleguaren jasangarritasunean ondorio zuzenak baitituzte. "Egunero 10.000 arabar falta dira lanean", ohartarazi du. “Absentismoak ez du kausa bakar bat, ezta irtenbide magiko bat ere. Erakundeen, enpresen eta gizarte eragileen arteko begirada zabala eta erantzunkidea behar da”.
Diputatu nagusiak aste honetan bertan argitaratutako Espainiako Bankuaren azken txostena aipatu du, zeinak adierazten duen EAE aldi baterako ezintasun-egoeran dauden pertsonen ehuneko handiena duen autonomia erkidegoa dela.
Absentismoa saihesteko hiru ildo nagusi zehaztu dituzte: osasun fisikoa eta emozionala zaintzeko prebentzioa, laguntza eta garapen profesionala eta lan-giro ona izatearen garrantzia.