Langabeziak behera egin du 2026ko bigarren hiruhilekoan, bai Nafarroan, bai EAEn, INE erakundearen biztanleria aktiboaren inkestaren arabera. Nafarroan 3.300 langabe gutxiago zenbatu dira (-%10,8), eta hala, guztira 27.700 dira langabezian daudenak; langabezia tasa %8,07koa da. EAEn, berriz, jaitsiera handiagoa izan da: 12.400 pertsona gutxiago daude langabezian (-%13,8), eta langabezia tasa %7,11ra jaitsi da, 77.200 langaberekin.
Enpleguak ere gora egin du bi lurraldeetan. Nafarroan 5.100 lanpostu sortu dira hiruhilekoan, eta okupatutako pertsonen kopurua 315.200era igo da; biztanleria aktiboa ere 342.800 lagunekoa izatera iritsi da. EAEn, berriz, 7.800 enplegu berri sortu dira, eta okupatuen kopurua 1.007.600 pertsonara igo da. Hala ere, urte arteko datuek bestelako joerak erakusten dituzte: Nafarroan iaz baino 400 langabe gehiago eta 2.900 enplegu gutxiago daude; EAEn, aldiz, okupatuen kopurua 12.800 pertsonatan hazi bada ere, langabeen kopurua 800 pertsonatan handitu da urtebetean.
Beste adierazle batzuei dagokienez, Nafarroan gazteen langabeziak gora egin du eta %27,45era iritsi da, 25 urtetik beherako 1.600 langabe gehiago izanik. EAEn, aldiz, gazteen langabezia apur bat jaitsi da (%21,47), eta kontratu mugagabeek gora egin dute: 21.600 gehiago dira aurreko hiruhilekoarekin alderatuta, aldi baterako kontratuak 4.800 gutxitu diren bitartean. Nafarroan ere handitu egin dira kontratu mugagabeak, 2.500 gehiagorekin, eta langabeziak behera egin du industrian, zerbitzuetan, nekazaritzan eta eraikuntzan; EAEn, berriz, beherakadarik handiena zerbitzuetan eta industrian izan da, nahiz eta eraikuntzan langabe kopuruak gora egin duen.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta