Familia-enpresentzako ikastaroa eskainiko du Bilboko Merkataritza Ganberak, Cebek Bizkaiko enpresen elkartearen, EHUren eta Bizkaiko Foru Aldundiaren laguntzarekin, urriaren 15ean. 09:30ean hasiko da, eta parte hartzea doakoa den arren, aurrez izena eman beharko da ganberaren webgunearen bitartez.
'Familia-enpresan bezero berriak lortzea: edonoren eskura dauden marketin digitaleko estrategiak' izenburupean, jardunaldiak helburu izango, hain zuzen ere, marketin digitaleko salmenta-estrategien gainean hausnartzea.
Urko De La Torre Adi Revolutioneko zuzendari exekutiboak haren ezagutza partekatuko du eta zenbait gai jorratuko ditu, besteak beste, marketin digitalaren jatorria, egoera eta joerak familia-enpresetan. Adibideak ere erakutsiko dira, bai arrakasta izan duten enpresenak, bai porrot egin dutenenak; hala, parte-hartzaileek “modu praktikoan ulertuko dute” marketin digitalaren garrantzia, “funtsezko faktorea izan baitaiteke bezero berriak erakartzeko eta zabaltzeko”. Autoebaluazioa ere egingo dute bertaratutakoek, bakoitzaren marketin digitalaren eraginkortasuna neurtzeko helburuarekin.
Topaketa 'Familia-enpresaren etorkizuna ezagutzen' izeneko zikloaren parte da, eta, orotara, hamabost jarduera egingo dira. Hurrengo jardunaldia azaroaren 6an egingo da, 'Pertsona fisikoen eta familia enpresen itxiera fiskala planifikatzen' izenburupean.