Imanol Pradales EAJren lehendakarigaiak deskarbonizazio-prozesuari "antsietaterik gabe" heldu behar zaiola azpimarratu du, enplegua eta lehiakortasuna "arriskuan" jarri gabe, eta euskal industriaren "eskutik" egin behar dela argitu du. Hautagai jeltzaleak trantsizio energetikoari buruzko ekitaldi batean parte hartu du ostegun honetan Gasteizen, eta EAJk ekonomiaren deskarbonizazioarekin duen konpromisoa berretsi du.
Pradales ziur agertu da trantsizio energetiko prozesu bati ekitea "beharrezkoa" dela. Ildo horretan, gogorarazi du Mercedes Benz enpresak duela gutxi baieztatu duela milioi bat euro inbertituko dituela Gasteizen duen lantegian furgoneta elektrikoen fabrikaziora egokitzeko.
EAJko lehendakarigaiak azpimarratu duenez, inbertsio hori "EAJ buru duten erakundeen lankidetzari esker egin da, eta Mercedesen gaur egun dauden 5.000 lanpostu zuzenak ez ezik, belaunaldi oso baten etorkizuna ere bermatzen du".