LAB, ESK, Steilas, EHNE-etxalde eta Hiru sindikatuek elkarretaratzea egin dute ostegun honetan Bilbon, Ascobi - Bieba eraikuntza sektoreko patronalaren egoitzaren aurrean, aste honetan Berangon (Bizkaia) izandako lan istripuaren ostean. Sektoreak duen prekarietatea salatu eta "erantzukizuna bere gain hartzeko" eskatu diote sindikatuek patronalari.
Joan den astelehenean 63 urteko behargin bat hil zen Berangon, luxuzko txalet baten eraikuntzan lanean ari zela, koadro elektriko bat gainera erorita.
Aritz Azkona LAB sindikatuko Eskumaldea Industriako arduradunak salatu duenez, "lan istripuak nahiko ohikoak dira eraikuntzaren sektorean, materiala erortzen delako, langileak altueratik erortzen direlako edo beste lan baldintza negargarri batzuk daudelako". Hala, elkartasuna adierazi die asteartean hildako langilearen senideei eta lagunei.
Azaldu duenez, aste honetan gertatutakoa "ez da aurten eraikuntzan hil den lehen istripua", eta patronalari erantzukizuna bere gain hartzeko eskatu dio, "laneko heriotzak eta osasunaren galera saihestu behar direlako".
Ildo beretik, Azkonak azpimarratu du beharrezkoa dela politika publikoak aldatzea, "langileen osasuna eta bizitza lehenetsiz", baita "neurri erradikalak” ezartzea, “arazoaren sustraira doazenak, kasu honetan azpikontratazioa eta sektorean gertatzen den prekarietatea", ekiditeko.