Eibarko Udalak, Bic Gipuzkoarekin eta hainbat erakunderekin batera, Toribio Echevarria Sarien 35. edizioa jarri du abian, “Ekintzailetza Teknologiko eta Berritzailearen Euskadi Sariak” izenarekin ezagutzen direnak. Euskal ehun ekonomikoan enpresa-ekimena, berrikuntza eta sormena sustatzea du helburu deialdiak, teknologiari arreta berezia eskainita.
Hiru kategoriatan banatzen dira sariak: Start-upak eta Enpresa Ekimenak, bost urte baino gutxiagoko ekimenei zuzendua; Enpresa Berritzailea, izaera teknologikoko enpresa jarduera berria sortzeko prozesuan daudenentzat; eta Eibarko Enpresa – Made in Eibar, industria aurreratua, sportech eta trantsizio ekologikoa bezalako sektoreetako tokiko proiektuetara bideratua. Kategoria horietako irabazle bakoitzak 12.000 euroko saria lortuko du eskudirutan eta hainbat laguntza osagarri izango ditu prestakuntzan, finantza aholkularitzan eta nazioartekotzean.
Hautagaitzak 2025eko urriaren 9ra arte aurkeztu ahal izango dira. Proiektuak bi fasetan ebaluatuko dituzte: batzorde tekniko batek lehenik, eta Eusko Jaurlaritza, Gipuzkoako Foru Aldundia, Gipuzkoako Merkataritza Ganbera, Elkargi, Confebask, EHU eta APD erakundeetako ordezkariek osatutako epaimahai batek ondoren. Bereziki baloratuko dira berrikuntza, merkatuko bideragarritasuna eta enplegua zein aberastasuna sortzeko gaitasuna.
Antolatzaileek nabarmendu dute edizio berriarekin “Euskal Herriko industria-ehunaren berrikuntzaren eta modernizazioaren kultura” sendotu nahi dutela, ideia berriei zein teknologiaren eta sormenaren bidez haztearen alde egiten duten enpresei lagunduta.