Nafarroa, Gipuzkoa eta Lapurdiko hainbat eragilek Translanekin mugaz gaindiko online plataforma abian jarri dute enplegu-bulego publikoek, giza baliabideetako enpresek, laneratzeak edo prestakuntza-zentroek lan-eskaintzak aurkitzeko edo beste eskualde batean kontratu bat formalizatzeko, modu "erraz eta praktikoan".
Proiektu honek formakuntza profesionaleko praktiketan dauden pertsonen, enplegu eskatzaileen, formakuntzan dauden pertsonen eta birmoldaketan dauden langileen enplegurako mugikortasuna hobetzea du helburu, mugaz bestaldeko testuinguruan. Horretarako, orientazio eta formakuntzako eragile publiko zein pribatuak, eragile ekonomiko eta enpresarialekin harremanetan jarriko ditu.
Proiektuak sei kide ditu. Akitania Berria eskualdeko Atelier Lan Berri ALB, Centre d´Appui à l´activité et à l´emploi Hendaye Pays Basque eta Institut Supérieur de Formation Permanente (INSUP Formation). Nafarroako Areté Activa zein Asociación de la madera de Navarra (Ademan) eta Gipuzkoako OlatuKoop ekonomia sozial eta eraldatzailea sustatzeko sarea.
Plataformak hainbat tresna libre eta doako eskaintzen ditu. Lehenengoa, 'Catiopy' izeneko mapa kolaboratiboa da. Bertan eskuragarri dauden baliabideak aurki daitezke, hala nola enplegu zerbitzu publikoak, laneratzeko zentroak edo lanbide-heziketa zentroak, besteak beste. Enplegu kualifikatuak bilatzeko motor bat ere jartzen du erabiltzaileen eskura. Horrela Lanbide, Pôle d 'Emploi eta Nafarroako Enplegu Zerbitzuarekin eta Eures enplegu-zerbitzuekiko lotura eta langile kualifikatuak falta diren sektoreetako lanpostuen zerrenda eguneratua eskaintzen da.
Bestalde, Mooc atalak online prestakuntza teoriko-praktikoa eskaintzen du prestakuntza libreko, doako eta eguneragarriko programa baten bidez. Azkenik "Action.translanekin" atalak youtubeko bideo-kanal bat ere badu.
Proiektuaren erabateko aurrekontua 630.000 eurokoa da. Honen % 59,95 Akitania Berrian kudeatuko da, % 27,20 Nafarroan eta % 12,85 Gipuzkoan. Proiektuaren % 65 Eskualde Garapeneko Europako Funtsaren (FEDER) bidez kofinantziatuta dago. Proiektua bi urteren bitartez garatzea aurreikusita dago. Parte hartzen duten lurraldeek duten langabezi tasa estatu mailakoa baino baxuagoa izanik, hainbat sektoreetan ez dira betetzen dauden lanpostu beharrak.
Olatukoopek nabarmendu duenez Translanekinek “besteek dituzten beharren ezjakintasuna” murriztea du helburu eta "ezinbestekoa da enpleguaren garapenerako eta mugaz bestaldeko formakuntza eskaintzen armonizaziorako."
Proiektuak hainbat helburu estrategiko ditu. Alde batetik mugaz bestaldeko egoeran oinarritutako tresna didaktikoen multzoa, eragileen formakuntza bat eta bide pedagogikoak garatu nahi ditu. Era berean, mugikortasun profesionalerako akonpainamendu tresna eta metodologiak ere elkarrekin garatu nahi ditu. Azkenik, lan mugikortasunaren inguruko jardunbide egokien komunitatea egituratu nahi du kideen sarearen indartzearen bitartez.