Trantsizio energetikoa ardatz duen nazioarteko Enlit Europe azoka egingo da azaroaren 18tik 20ra Barakaldoko (Bizkaia) BECen. Hitzorduak mundu osoko 140 herrialde eta 700 enpresa erakusketari baino gehiagotako 15.000 profesional baino gehiago bilduko ditu, eta trantsizio energetikoarekin lotutako erronkak eta aukerak aztertuko dituzte bertan.
“Oso pozik gaude Enlit Europe Bilbora eta BECera ekarriko dugulako”, adierazi du Paddy Youngek, Enlit Media erakundeko zuzendariak. Topaketan soluzio teknologiko berritzaileak eta energia sortzeko, banatzeko eta kontsumitzeko modua aldatzen ari diren arrakasta kasuak ezagutu ahalko dira.
Enlit Europe Bizkaian jasotzea “aukera paregabea” dela uste du Ainara Basurko Bizkaiko Foru Aldundiko Ekonomia Sustatzeko diputatuak; “munduari erakusteko nola ari garen aurrera egiten gure ekonomiaren deskarbonizazio adimendun baterantz, anbizio klimatikoa eta errealismo industriala uztartzen dituen trantsizio baterantz”.
Jardunaldiak kongresua, erakusketa eremua, hubak eta B2B bilerak bateratuko ditu “esperientzia integrala” eskaintzeko asmoz. Ehun hitzaldi baino gehiago eskainiko dira hiru egunetan zehar, eta erakusketak ere izango dira.
Xabier Basañezek, Bilbao Exhibition Centreko zuzendari nagusiak, ekitaldiaren eragin estrategikoa azpimarratu du: “Enlit Europerekin ekitaldien mundu mailako antolatzaile nagusietako bat BECera iristeak mugarria ekarri du. Lankidetza berri honek nazioartekotasun, eskakizun maila tekniko eta konplexutasun operatibo handieneko topaketak jasotzeko gure barrutiak duen gaitasuna berresten du”, nabarmendu du.