EAEko industria prezioak %0,2 handitu diren arren ekainetik uztailera, %0,4ko prezioen beherakada izan da aurreko urteko uztailaren aldean.
Eustatek emandako helburu ekonomikoaren araberako ondasunen sailkapena aztertuta ikus daiteke urtebetean oro har prezioak igo egin direla, baina energiak izan duen beherakada dela medio, indize orokorra -%0,4koa izan da. Izan ere, %3,2 handitu dira kontsumo ondasunen prezioak (%1,1 iraunkorrenak eta %3,8 ez-iraunkorrenak), %1,4 ekipo-ondasunenak eta %0,7 bitarteko ondasunenak, baina, energiaren prezioek %8,5eko jaitsiera izan dute.
Aurreko hilaren aldean, hau da, ekainarekin konparatuta, portaera bestelakoa izan da. Kontsumo ondasunen prezioak %0,7 txikitu dira, eta ekipo ondasunen zein bitarteko ondasunen prezioak %0,1. Kontrara, energiaren prezioek %2,1eko hazkundea pairatu dute.
2024ko uztailaren aldean prezioak sektoreka aztertuta, igoerarik handienak izan dituztenak Farmazia-produktuen fabrikazioa (%10,3), Produktu informatiko elektroniko eta optikoen fabrikazioa (%9,5) eta Material eta ekipo elektrikoen fabrikazioa (%8,7) alorrak izan dira. Jaitsiera izan dute, ordea, Koke-lantegiak eta petrolioa fintzea alorreko prezioek (-%9,7) eta Energia elektrikoa, gasa eta lurruna adarrekoek (-%7,0).