Europako Batasunak lanean jarraitzen du deskarbonizaziora bidean. Ostiral honetan, 2030erako energia kontsumoa % 11,7 murrizteko akordioa lortu du, hirugarren herrialdeekiko mendekotasuna murriztu eta klima-aldaketari aurre egin asmoz. Helburu horiek lortzeko, herrialde bakoitzak pixkanaka murriztu beharko du kontsumoa, %1,9 aurreztu arte, eta jabetza publikoko eraikinen azalera osoaren %3 berritu beharko du urtero, gutxienez. Hala ere, estatuek askatasuna izango dute beren helburu nazionalak eta indikatiboak ezartzeko, legez loteslea den helburu bakarra izango baita 27 estatuek oro har lortu behar dutena.
Halaber, herrialde kideek energia pobreziari aurre egiteko politika publikoak diseinatu beharko dituzte, eta 2050erako, 45.000 biztanletik gorako udalerri guztiek erabat deskarbonizatua izan beharko dute berokuntzaren eta hoztearen hornidura. Gainera, milioika eraikin berritu behar dira energia alferrik ez galtzeko, sektore horretan Europar Batasuneko berotegi-efektuko gasen heren bat isurtzen baita. Izan ere, eraikin horietako gehienak erregai fosilez berotzen dira, eta horrek ere egoera ahulean uzten du bloke komunitarioa, Ukrainan gerra piztu ondoren bizi izandako urritasunaren aurrean. Niels Fuglsangek, Parlamentuko negoziatzaile nagusiak, esan du helburu berriak klimaren aldeko benetako aldaketa eta Putinentzat desabantaila dakarrela.
Europako Batasunak 2021ean proposatu zuen %9 aurreztea, baina %13ra igo zen maiatzean, Errusiako erregaiak azkar uzteko ahaleginean. Gerra hasi aurretik, Mosku zen gas-hornitzaile nagusia Europan. Hala ere, murrizketa handiago horrek herrialde batzuen oposizioarekin topo egin zuen, gutxieneko helburuari eutsi nahi baitzioten. Azkenik, %11,7an geratu da, eta betetzen ez bada, Europako Batzordeak ekarpen txikiena egin duten herrialdeak zuzendu ahal izango ditu. “Energia aurreztea funtsezko urratsa da planeta salbatzeko. Azken hilabeteetan, europarrek erakutsi dute prest daudela eta gai direla erronka horri aurre egiteko”, adierazi du Frans Timmermans Batzordeko presidenteak.
Akordioa Europako Parlamentura joango da orain, azken bozketa egiteko. Izan ere, Europako Kontseiluaren eta Parlamentuaren artean adostu dute neurria, baina 27 estatuen eta Europako Parlamentuaren onespena behar dute oraindik.
Errusiako gas gutxiago kontsumitu nahian
Akordio horrekin batera, Kadri Simson Europako energia komisarioak ostiral honetan gogorarazi du Errusiako gasaren kontsumoa “nahita murrizteak” ondo funtzionatu duela, eta azarorako biltegiratze-maila egokia lortzeko bermerik onena dela. Batzordeak estatu kideei larrialdiko akordioa luzatzeko eskatu zien, eta, horren bidez, erregai horren eskaria %15 murriztu zen borondatez.
Europako konpromisoa uste baino hobea izan da; izan ere, Batzordearen datuen arabera, abuztutik urtarrilera bitartean gas naturalaren kontsumoa %19 murriztu zen, helburua baino lau puntu gehiago. Aldi berean, zortzi birgasifikazio-terminal berri jarri dira martxan, eskaria Errusiara jo behar izan gabe asetzeko.