Espainiako Gobernuak Europar Batasuneko merkatu elektrikoa erreformatzeko proposamen bat onartu du. Bertan, energia berriztagarrien ekoizleekin epe ertain eta luzerako kontratuak sustatzea proposatzen du, batetik, eguneroko merkatuei protagonismoa kenduz, eta, bestetik, gasa – ziklo konbinatuko zentraletan – ekoizpen berde nahikorik ez dagoenerako gaitasuna eta hornidura bermatuko duen merkatu batera bideratuz.
Teresa Ribera Trantsizio Ekologikorako ministroak bere proposamena aurkeztu dio Europako Batzordeari, Ministroen Kontseiluaren ostean. Adierazi duenez, indarrean dagoen sistema ez da iraunkorra energia berriztagarrien nagusitasun handiagoaren aurrean, ez eta azken urtean bizi izandako ezegonkortasun egoeran ere. "Energia berriztagarriek kostu operatibo txikiak dituzte, baina horrek ez dio mesederik egiten batez besteko kontsumitzaileari. Ziurtasuna behar dugu energiarako sarbideari dagokionez, horniduraren segurtasunari dagokionez, hori baita Europan tentsio handienarekin bizi dena", azpimarratu du.
Espainiak proposatzen duen erreforman, arautzaileak epe luzerako energia kontratatuko luke zentral inframarginalekin (berriztagarriekin), diferentzien araberako kontratuen bidez, prezio finkoan eta kostuetara bideratuta, eta gaitasun-merkatuak sartzen ditu ahalmen irmoa edo malgua eskaintzen duten zentraletarako. Eredu horrek, egonkortasuna sortuko luke. Bazterreko teknologiek – hala nola gasak edo ikatzak – eguneroko merkatuetara joaten jarraituko dute energia saltzera, azken merkaturatzaileekin edo kontsumitzaileekin eperako kontratuak ezartzeko aukera alde batera utzi gabe.
Riberak Espainiaren papera defendatu du azken eztabaida energetikoetan, eta merkatu elektrikoaren erreformaren alde egin duen lehen herrialdea izan da, Ukrainako gerraren tentsioak eredua muturrera eraman aurretik. Halaber, pozik agertu da salbuespen iberikoaren arrakastagatik.
Ministroaren esanetan, neurri horrek 4.500 milioi euro aurreztu ditu elektrizitatea ekoizteko erretzen den gasaren prezioa murrizteko, eta horri esker, argindarraren prezioa murriztu ahal izan da gure herrialdeko merkatu nagusian. Gobernuak 2024ra arte luzatzea ere eskatuko du, energiaren merkatuaren egiturazko erreforma zehaztu arte.