Ignacio Sanchez Galan Iberdrolako presidenteak Davoseko Munduko Ekonomia Foroan iragarri duenez, 3.000 milioi euro inbertituko ditu hidrogeno berdean, Europako Itun Berdea bizkortzeko. Galanek adierazi duenez, hidrogeno berdea da orain Europaren erronka nagusia, "aukera bat", eta teknologia horretan inbertsioak sustatzeko Europako esparru egonkor bat diseinatu behar da.
Iberdrolaren ustez, hidrogeno berdeak industria-aukera handiak ekarriko ditu elektrifikatzeko zailak diren energia-erabileretan, eta "ezin da tren hori galdu". Horretarako, inbertsioa eta erregulazio-esparru egonkor bat aldarrikatu du. Gainera, azpimarratu du EBen jarduera koordinatua funtsezkoa dela hidrogeno berdean helburu handinahiak lortzeko, hidrogeno berdea ekoizteko ahalmena 2.000 aldiz biderkatu behar baita.
Itun berdearekin bat
Iberdrolak maiatzaren 13an Europan industria-erabilerarako hidrogeno berdeko plantarik handiena inauguratu zuen Ciudad Realen. Instalazioak 3.000 tona hidrogeno berde ekoitziko ditu urtean, Fertiberia enpresak amoniakoa ekoizteko erabiliko duena.
Era berean, Iberdrolak Europako Itun Berdea bizkortzeko manifestua sinatu du Europako hainbat multinazionaleko zuzendarirekin batera. Besteak beste Ikea, Basf, Unilever, Deutsche Bank, Coca-cola, HSBC eta Bayer enpresetako zuzendariek sinatu dute manifestua. Sinatzaileak prest daude arduradun politikoekin batera lan egiteko Europa kontinente berdeago bihurtzeko, energia-behar larriak eta munduko elikagaien segurtasunaren arriskuak "aukera ekonomiko" bihurtzeko.
Europako Itun Berdea 2020an sinatu zen. Gaur sinatutako akordioak babesa jasotzen du berotegi-efektuko gasen isuriak 2030ean gutxienez % 55 murrizteko eta 2050ean erabat ezabatzeko.
Ibilgailu elektrikoentzako kargagailuetan inbertsioa
Bestalde, Iberdrolak atzo iragarri zuen 150 milioi euro inbertituko dituela 150.000 karga-puntu inguru jartzeko. Horietatik 2.500 publikoak izango dira. Kargagailuak 2024rako erabilgarri izango dira. Inbertsio horrekin konpainia bizkaitarrak ibilgailu elektrikoen kargaren alorreko lidergoa lortu nahi du. Hala iragarri zuen Raquel Blanco Smart Mobility energetikoaren zuzendari globalak, Nissan Foroan emandako hitzaldian. Bertan karga-puntu ultra-azkarren garrantzia nabarmendu zuen. Teknologia hori ardatz izango du konpainiak, ibilgailua bost minututan soilik kargatzea ahalbidetuz.