Aixeindarrek, Energiaren Euskal Erakundeak (%40) eta Iberdrolak (%60) 2019an eratutako sozietateak, Labrazako eta Azazetako parke eolikoen proiektuetarako (Araba) ingurumen baimen positiboak jaso ditu, ohar bidez jakinarazi duenez.
40 megawatteko potentzia duten instalazio berriztagarriak izango dira, eta, hala, 2006az geroztik Euskadin martxan jarriko diren eta energia %100 berdea sortuko duten lehen instalazio eolikoak izango dira. Bi proiektuak lehendik dauden azpiestazioetara konektatuta egongo dira eta horrek lagunduko du ingurumenaren gaineko eragina murrizten.
Bi parke eolikoak Araban egongo dira kokatuta, Labrazan (Oion) eta Azazetan (Arraia Maeztu eta Bernedo) eta gaur egun Euskadin jada instalatuta dagoen ahalmen eolikoari gehituko zaizkio. Aixeindarren arabera, martxan jarritakoan, proiektuek energia garbia sortuko dute 107.000 etxebizitza baino gehiagotan, eta urtean 50.000 tona karbono dioxido baino gehiago atmosferara isurtzea ere saihestuko dute. Gaineratu duenez, instalazioek “tokiko ekonomia eta enplegua suspertzen lagunduko dute”, puntako aldietan 470 profesional egongo baitira lanean.
Horrez gain, Aixeindarrek Euskadiko lehen instalazio misto eoliko eta fotovoltaikoa eraikitzea aurreikusten Laminoriako Erret Haranean (Araba) eta dagokion baimena eskuratzeko zain dago. Proiektu horrek 40 megawatteko parke eolikoa eta beste 49 megawatteko instalazio fotovoltaikoa hartuko lituzke bere baitan.