Adegik prentsaurrekoa eskaini du gaur, Gipuzkoako Koiunturari buruzko inkestaren emaitzak aurkezteko eta egoera ekonomikoa aztertzeko, bihar egingo baitu Adegik Urteko Batzarra.
Merkatuaren egoerarekin hasita, enpresen %79k adierazi du egungo egoera normaltasunean edo suspertze prozesuan dagoela, iaz baino bi puntu gutxiagorekin. Ondorioz, gora egin du merkatuaren egoera atzeraldikoa dela uste duten enpresen kopuruak, iaz baino 2 puntu gehiagorekin (%21). Sektoreka, industria enpresak dira datu ezkorrenak eman dituztenak: merkatua atzeraldian dago industria enpresen %27,5arentzat, eta, aldiz, zifra hori %11ra jaisten da zerbitzu enpresen kasuan eta %7,5era eraikuntza enpresen kasuan.
Enpresen fakturazioak ez du gorabehera handirik izan aurreko hiruhilekoaren aldean, industria sektoreak behera egin duen arren (-%0,7) eraikuntzaren eta zerbitzuen sektoreak gora egin duelako. Orotara, barne-merkatuaren fakturazioak egin du gora (%0,8), eta, behera, aldiz, kanpo-merkatuarenak (-%1,3). Salmentek hazkundea izan dute hiru sektoreetan aurreko hiruhilekoaren aldean: %26 zerbitzuen sektorean, %26,5 industria-enpresetan eta %33,5 eraikuntzan. Hala, puntu batean jaitsi da salmentak behera egin dutela adierazi duten enpresen kopurua (%23), hamar puntu gehitu da salmentak berdin mantendu direla esan dutenena (%50), eta hiru puntu handitu da salmentak mantendu edo gehitu direla baieztatu dutenen kopurua (%77).
Enpresen eskaera-mailak baxua izaten jarraitzen du: %22,5 inguruan mantentzen da, hau da, 2021eko urtarrilaz geroztik izandako mailarik baxuena, eta iazko zenbatekoa bi puntu txikituta. Hiru enpresetatik batek (%33,5) dio eskaera-maila altua duela eta enpresen ia erdiak (%43,5) eskaera-maila normala duela dio. Ekoizpen ahalmena ere puntu bat beheratu da urtebetean, nahiz eta urtarrileko maila baino 0,5 puntu handiagoa den.
Plantillari eta enplegatu kopuruari dagokionez, negozioen gehiengoak (%91) uste du berdin mantendu edo handitu egingo dela, nahiz eta industriaren kasuan enpleguaren sorrera gelditu egin den. Zehazki, plantillan aldaketarik ez egotea aurreikusten du enpresen %73,5ak, iaz baino 6,5 puntu gehiagorekin; enplegu-maila jaitsiko duten enpresen kopurua 2,5ean beheratu da urtebetean, soilik inkestatuen %9k adierazi baitu hori.
Azkenik, kezka-faktoreak zein diren ere aztertu dute berriro ere Adegikoek, eta gaur egun ondorengoak dira kezka nabarmenenak: lan-kostu altuak eta soldata igoerak (%43,5, iaz baino 7 puntu gutxiago), nazioarteko ekonomiaren ahultasuna (%36,5, iaz baino 3,5 puntu gehiago), langile kualifikatuak lortzeko zailtasunak (%35,5, iaz baino 8,5 puntu gutxiago) eta lan-absentismoa (%32,5, iaz baino 5 puntu gehiago).