Jaurlaritzak eta Konfekoopek FCR-PyME deituriko arrisku-kapitaleko funtsa sortu dute. Kooperatiben finantzazioan lagundu eta inbertsio berriak eskaintzeko aukera emango du funts berriak, eta Konfekoop-ek jarritako 2 milioi euro izango ditu abiapuntu. Halaber, SPRI Taldeko Arrisku Kapitalaren Sozietate Kudeatzaileak kudeatuko du.
Akordioa Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak eta Rosa Lavín Konfekoopeko presidenteak sinatu dute. Haiekin izan dira Arrate Aranbarri eta Zigor Urkiaga EAEko Arrisku Kapitalaren Kudeaketako zuzendari nagusia eta presidentea, eta Iñaki Nubla Konfekoopeko zuzendaria.
Zehazki, industria sektoreko kooperatibei laguntzeko sortu dute FCR-PyME, Euskal Herriko enpresak etorkizuneko industria sektoreetan finkatzeko asmoz.