Eibarko Lan Arloko Epaitegiak Auzo Lagun kooperatiba zigortu du Gizarte Segurantzaren prestazio guztietan %30eko errekargua ordaintzera, langile bati lanerako ezintasun iraunkor osoa aitortu ondoren. Kaltea garbiketa-lanetan erabilitako produktu kimikoen eraginpean emandako urteen ondorioa izan zen, eta enpresak ez zuen prebentzio-neurri eraginkorrik aplikatu.
EAEko CCOO sindikatuak jakinarazi duenez, langileak hainbat baja mediko izan zituen 2018 eta 2020 artean, ahoko aften eta dermatitis narritagarriaren moduko lesioengatik, eta horrek ezintasunaren aitorpen ofiziala ekarri zuen. EAEko Auzitegi Nagusiak 2022an emandako epaiak jada zehaztua zuen gaixotasunaren lan-jatorria, eta auzitegi horrek berak 58.381,07 euroko kalte-ordaina ordaintzera zigortu zuen enpresa 2024an.
Epaiak nabarmentzen du enpresak ez zituela behar bezala ebaluatu lanaren arriskuak, eta, gainera, ez zuela erakutsi horren arriskutsuak eta lurrunkorrak zirenik erabiltzen ziren garbiketa-produktuak. Produktu horietako batzuek, CCOOren arabera, arriskuaren gaineko ohar esplizituak zituzten, batez ere, ingurune itxietan baimendutako gehieneko mailak gainditzen baziren.
Lanpostua langilearen egoera medikora egokitu zela argudiatu zuen orduan Auzo Lagunek, baina neurria ze zela nahikoa izan ebatzi zuen auzitegiak. Sindikatuak azpimarratu du premiazkoa dela produktu kimikoen eraginpean egotearen aurrean neurri zorrotzagoak hartzea, are gehiago, gaur egungo tenperatura-igoeraren testuinguruan, produktuen lurrunkortasuna handiagoa baita.