Lan eta Gizarte Segurantza Zuzendaritzak 196.746 euroko isuna jarri dio CAFi, lan-arriskuen prebentzioaren arloan arau-hauste "oso larria" egiteagatik. LAB sindikatuak jakinarazi du gertatutakoa. Zigorra 2023ko abuztuan amiantoa kentzeko prozesuan izandako gertakarien ondorioz ezarri dute. Beasaingo lantokiko zenbait nabetan amiantoa kentzeko plana egin zuen enpresak. Sindikatuaren arabera, prozesua amaitutakoan, prebentzio-neurri egokiak hartu ez zituelako eta neurketa egokiak egin ez zituelako, CAFek ehunka langile jarri zituen amiantoarekin harremanetan, beharrezko babes-neurririk gabe.
CAFek bere ardura guztiak bere gain hartzea eskatu du sindikatuak. Bestalde, LABek adierazi du ebazpen honek agerian utzi duela sindikatuak salatutakoa: "CAFek ez zituen beharrezko prebentzio-neurriak bermatu, eta langileen osasuna arriskuan jarri zuen".
Ebazpenak jasotzen du CAFeko sei langileren neurketa pertsonaletan amianto-zuntzen presentzia hauteman zela. Sindikatuak jakinarazi duenez, ehunka langilek lan egin zuten eremu horietan, gertakariak izan aurreko egunetan. Prentsa-ohar batean azaldu dutenez, egoera horrek "agerian uzten du gertatutakoaren larritasuna eta beharrezkoa dela egoera sakon argitzea". LABek elkartasun eta babes osoa adierazi die egoera horrek eragindako langile guztiei eta haien senideei.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta