Dominion zerbitzu eta proiektu multiteknologikoen euskal konpainiak, Equita inbertsio banku italiarrarekin aliantzan, lau proiektu fotovoltaiko eraikiko ditu Italian, orotara 74 megawatteko (MW) gaitasunarekin. Horietatik bi proiektu Sizilian kokatzen dira, eta beste bi Basilicatan. Equita Green Impact Fund (EGIF) funtsaren lehen inbertsioa da, eta 2025. urtearen amaierarako 200 milioi euro kudeatu nahi ditu.
Izan ere, proiektu fotovoltaikoak garatu ostean, Dominionek bere partaidetzaren %75 salduko dio banku italiarrari, azken hori bilakatuta lau proiektuen jabe nagusi. Hala ere, euskal konpainiak jabetzaren %25 mantenduko du, bazkide eraikitzaile edo bideratzaile gisa.
Bi proiektu jada jarri dira martxan, Troinan (Sizilia) eta Tolven (Basilicata), eta gainerako biak 2025eko bigarren hiruhilekoan hasiko dira. Gainera, azaldu dutenez bi alderdiek elkarrekin egingo dute lan energia saltzeko estrategietan.