Eroskik eta Europako Inbertsio Bankuak (EIB) 40 milioi euroko mailegu bat itxi dute, Euskal Herrian eta Espainiako Estatuan dituen saltokietan energia eraginkortasuna eta berrikuntza digitala bultzatzeko. Inbertsio horrek 1.500 supermerkatu ingururi eragingo die, energia kontsumoa optimizatzeko eta berotegi efektuko gasen emisioak murrizteko xedearekin.
Proiektua ez da mugatzen soilik energia aurrezpenera: teknologia digital aurreratuak ere bultzatuko ditu, hala nola, adimen artifiziala eta datuen analisia, "bezeroen esperientzia hobetzeko eta hornidura katearen segurtasuna indartzeko". Era berean, hozte industrialeko sistemak eta denden berokuntza eta aireztapena modernizatuko dira, hozgarri iraunkorragoetara egokituta.
Pilar Solanok, EIBko Finantzaketa Korporatiboko zuzendariak, honakoa azpimarratu du: "Eroskiren digitalizazioan eta energia eraginkortasunerako inbertsioetan lagunduz, erregai fosilen mendetasuna murrizten ari gara eta Europako txikizkako sektorearen lehiakortasuna eta hazkuntza iraunkorra sustatzen ditugu".
Josu Mugarra Eroskiko finantza zuzendariak gaineratu duenez, inbertsioek aukera ematen dute sarearen operazioak optimizatzeko eta bezeroei eskaintzen zaien balioa hobetzeko: "Modu arinago eta zorrotzagoan egokitu gaitezke bezeroen beharretara, energia kontsumoa gutxituz eta teknologia berritzaileak ezarriz".
Mailegua TechEU eta REPowerEU programen barruan kokatzen da, zeinak Europar Batasuneko berrikuntza teknologikoa sustatzeaz gain, erregai fosilen inportazioarekiko mendetasuna murriztea du helburu. Eragiketa honek, halaber, Eroskiren eta EIB Taldearen klima-ekintzaren eta digitalizazioaren lehentasun estrategikoekin lerrokatzen da.