Errekak Darwin Biomed ingeniaritza biomedikoko konpainia nafarrarekin aliantza estrategikoa sinatu du, euren osasun negozioa bultzatzeko asmoarekin. Antzuolan kokatuta dagoen enpresak kaleratu duen oharraren arabera, enpresak "ingeniaritza aktiboak" eskuratu ditu etorkizunean adimen artifizialaz eta software aurreratuaz hornitutako soluzio mekatroniko berriak garatzeko.
Lander Sagarna Errekako Berrikuntza eta Negozio Berrien zuzendariak positibotzat jo du enpresa nafarrarekin sinatutako lan hitzarmena: "Uste dugu hau albiste ona dela Darwin bezalako start-upentzat; izan ere, bazkide finantzarioa izateaz gain, hainbat arlotan lagun dezakegu, hala nola produktuaren optimizazioan, merkaturatzeko denbora murrizten edo saldu osteko azpiegitura ematen".
Halaber, Mondragon taldeko konpainiak osasunaren alorrean "apustu garbia" egin duela nabarmendu du, pertsonen mugikortasunerako laguntzen esparruan, medtech eremuan eta gailu medikoetarako osagaien garapenean. Hein horretan, Gorka Mendiaraz osasun arloko zuzendariaren esanetan, "lankidetza berri honen bidez, Errekak “indartu egin du pertsonen mugikortasuna bermatzeko irtenbideen esparruan duen posizioa".
Inbertsio aliantza berri hau Darwin Biomedeko ekintzailetza gaitasunak aktibatzeko eta kooperatiben artean negozio berriak sustatzeko egin da, hazteko gaitasuna duten enpresa gazteen aldeko apustuarekin.