Euskadiko Parke Teknologikoak bere sei campusetan 692 enpresa zientifiko eta teknologikorekin amaitu zuen 2025. urtea, 700 konpainien langatik oso gertu geratuta. Urteko Jardueraren Txostenaren arabera, enpresa horiek guztira 9.257 milioi euroko fakturazioa eta 24.395 langileko plantilla izan zituzten. Datu nagusiek goranzko joera erakusten dute, enpresa kopurua %3 hazi baita, fakturazioa %12,3 eta enplegua beste %3.
Hazkunderik handienetako bat I+G arloan izan da. Jarduera horretara bideratutako inbertsioa %30 handitu da urtebetean, 660 milioi eurotik 854 milioira igarota. Txostenak nabarmentzen duenez, Eusko Jaurlaritzaren 2030eko Industria Planaren barruan estrategikotzat jotzen diren sektoreek dagoeneko Parkeko enpresen fakturazio osoaren %76 ordezkatzen dute. Fakturazioari dagokionez, sektore nagusiak aeroespaziala eta soluzio digital aurreratuak izan dira, eta enpleguari dagokionez I+G eta energiaren arloak izan dira liderrak.
Jaione Ganzarain Euskadiko Parke Teknologikoko presidenteak adierazi du I+Gko inbertsioaren hazkundeak erakusten duela EAEk industria erronkei aurre egiteko oinarri sendoa duela. Halaber, azaldu du enpresen jardueraren eta espazio eskaeraren gorakadari erantzuteko lurralde hedapena sustatzen ari direla, baita etorkizuneko proiektu estrategikoentzako eremuak gordetzeko ere.
Era berean, Parke Teknologikoetako langileen profilak aztertuta ikus daiteke kualifikazio handiko enpleguak nagusi direla oraindik ere, lizentziadunek eta doktoreek plantillaren %62 osatzen baitute. Lanbide heziketatik datozen profesionalen kopurua ere 6.272ra igo da. Gainera, I+Gn lanean ari diren pertsonak 7.707 dira dagoeneko, emakumeen presentzia %42ra iritsi da eta zuzendaritza postuetan emakumeen ehunekoa %22,5era igo da. Azkenik, jakinarazi dute 30 urtetik beherako 4.751 langile zeudela Parkeko enpresetan 2025aren amaieran.