Kimua Group enpresak Lizartzan (Gipuzkoa) du egoitza, eta industriako osagai handientzako jasotze eta garraio soluzioetan espezializatuta dago. 2024ko azaroan, aurrerapauso nabarmena eman zuen euskararen esparruan, Indeus Industriaren Euskal Plataforman sartu baitzen. Spri agentziak eta Eusko Jaurlaritzak gidatutako ekimen horrek ideia estrategiko batekin konprometitutako enpresak biltzen ditu: euskara integratzea, lehiakortasun, berrikuntza eta belaunaldien arteko kohesioa bultzatzen duen aktibo gisa.
Kimuak bat egin du programa horrekin, eta enpresa ikuspegi horrek teknologiaren eta eraginkortasunaren alde egiteaz gain, berezko hizkuntzak ekoizpen inguruneetan duen balio bereizgarriaren alde ere egiten du. Euskara eremu teknikoetan, administratiboetan eta prestakuntzakoetan erabiltzea ingurunea eraldatzeko eta harekin bat egiteko beste tresna bat da.
Enpresaren bihotzean helburu bikoitza dago: berrikuntza teknologikoa eta ingurune linguistiko eta kulturalarekiko konpromisoa. Osagai industrial handiak jasotzeko, garraiatzeko eta finkatzeko soluzioen diseinuan eta fabrikazioan espezializatuta – batez ere sektore eolikorako eta ontzigintzarako -, Kimuak puntako teknologia jarri du bere lehiakortasunaren oinarri gisa. Lucas Mejia Kimuako negozioa arduradunak enpresaren misioa esaldi baten bitartez definitzen du: “Edozein zama, handi, astun edo sentikorren manipulazio berezi baten beharra daukazunean, guk soluzio egokiena eman, diseinatu eta martxan jarriko dugu”.
Arlo teknikoaren aldeko apustu hori ez da modu isolatuan ulertzen: ikuspegi integral batekin batera doa, non euskara beste aktibo estrategiko bihurtzen den, berrikuntzari, barne komunikazioari eta identitateari lotuta.
Lucas Mejia (Kimua): “Edozein zama, handi, astun edo sentikorren manipulazio berezi baten beharra daukazunean, guk soluzio egokiena eman, diseinatu eta martxan jarriko dugu”
Indeus programan sartzea Mejiaren ezagun baten proposamena izan zen. Ismene Bakedano konpainiaren pertsona eta kultura lantaldeko arduradunak hala aitortu du: “Egun Indeuseko parte gara eta pixkanaka Kimuan eragiten laguntzen digu. Kimuako langileen ia %100k badaki euskaraz. Gure bezero gehienak atzerrikoak dira eta dokumentazioa gazteleraz edo ingelesez daukagu. Une honetan, sortzen den barne dokumentazioa euskaraz eta erderaz sortzeko bidean gara”.
Kimua plan jakin bat prestatzen hasi da euskararen erabilera eremu gakoetan kokatzeko, hala nola kudeaketan, prestakuntza teknikoan eta prozesuen digitalizazioan. Lan ildo horrek ideia argi bat du abiapuntu: euskara ez da soilik erabilera sozial edo sinbolikoko hizkuntza, baita eta ezagutza espezializaturako eta lehiakortasun industrialerako bidea ere.
Alde horretatik, Kimuak defendatzen duen ikuspegia hurrengoa da: hizkuntzak eta teknologiak ez dute elkar lehiatzen, bata bestea indartu baizik. Euskara tresna digitaletan, barne-kudeaketako plataformetan edo dokumentazio teknikoan sartzeak, aukera ematen dio enpresari eredu inklusiboago, eraginkorrago eta propioago baterantz aurrera egiteko, bere lurralde eta belaunaldi errealitatearekin lerrokatuta.
Momentuz, barne komunikazioan eta dokumentazioan bereziki murgilduta dago. Bakedanoren arabera, Indeusek egiten dituen topaketetatik beti ateratzen da interesgarria izan daitekeen ondorioren bat. Oso aberasgarria izaten da enpresa ezberdinak gai baten inguruan elkartzea eta esperientziak partekatzea: “Nire uste apalean, ahalduntzen lagundu digu Indeusek, euskara gure egunerokoan naturaltasunez erabiltzen genuen arren, lantaldeak elkartzen zirenean gazteleraz egiten zen gutxi batzuk ez zekitelako euskaraz. Egun, itzulpenak egiteko gai diren lankideen eskuzabaltasunari esker, aldi bereko itzulpena egiten da eta euskarazko komunikazioa bermatzen da, naturaltasunez hizkuntzen arteko bizikidetza lortuz,” gehitu du.
Ismene Bakedano: “Nire uste apalean, ahalduntzen lagundu digu Indeusek, euskara gure egunerokoan naturaltasunez erabiltzen genuen arren, lantaldeak elkartzen zirenean gazteleraz egiten zen gutxi batzuk ez zekitelako euskaraz"
Produktuak eta zerbitzuak euskaraz eskaintzea da hurrengo erronka. Oraintxe bertan Kimuaren Karga Froga Laborategian dauden saiakuntza-bankuak Lamia eta Basajaun izena dute. Arin elebazio kutxak beste adibide on bat dira, beti jatorrizko zigilu pertsonala daramatelako. Horien identitatea galdu ez dadin, kanpoan saltzen dituztenean izenaren jatorria azaltzen diete bezeroei.
Mejiaren arabera, Kimuaren produktu horiek erreferente dira bai gaitasun aldetik bai malgutasun aldetik ere. “Zama Froga-Lab edukitzeak, altxaera (elebazio) soluzio berri baten diseinu bat egiteko momentuan, aukera gehiago ematen dizkigu diseinu berri bat egiteko eta hori abantaila da gure nazioarteko bezeroentzat. Gaur egun, hainbat herrialdeetara bidaliko ditugun altxaera (elebazio) soluzioak frogatzen ari gara, bost kontinenteetara iritsiko dira,” azaldu du.
Euskal Herriko beste industria enpresa Indeusekin bat egitera animatzen ditu Bakedanok: “Gure kasuan oso denbora gutxi daramagu, baina gaur-gaurkoz esan dezakegu, hainbat enpresa euskararekiko konpromisoaren haritik lotu gaituela Indeusek. Horrek esperientzia, erronka eta bizipenak partekatzeko aukera eman digu, egun erabili ditzakegun tresnak mahaigaineratuz eta gure eskura jarriz”, amaitu du.