Eusko Jaurlaritzak Enagas enpresaren %1 erosi du, Finantzen Euskal Institutuaren (FEI) bidez eta Indartuz sozietatea erabilita. Jaurlaritzak azaldu du erosketa hau, 45 milioi eurokoa, Euskadi Eraldatuz 2030 Planaren barruan egin dela, eta energia-hornidura sendotzea eta etorkizuneko energia-proiektuetan parte hartzea dituela helburu.
Jaurlaritzaren esanetan, Enagasek zeregin garrantzitsua du energia-sisteman, eta etorkizunean hidrogeno berdearen azpiegiturak garatzen ere parte hartuko du. Gainera, Eusko Jaurlaritzarekin batera Hub COnet2 proiektua gidatzen du. Proiektu horren helburua industria-sektoreetako CO₂ isuriak murrizten laguntzea da.
Jaurlaritzak adierazi du inbertsio horrek bi helburu dituela: batetik, EAEren energia-autonomia indartzea, eta, bestetik, hidrogeno berdearen, CO₂aren garraioaren eta erregai berriztagarrien inguruko proiektuetan lurraldeak presentzia handiagoa izatea. Era berean, 163 kilometroko hidrogeno-sarea eraikitzea aurreikusten da, dagoeneko dauden azpiegiturak ahal den neurrian berrerabilita.
Erosketa Euskadi Eraldatuz 2030 estrategiaren barruan kokatzen da. Jaurlaritzak gogorarazi du plan horren bidez beste inbertsio batzuk ere egin dituela, eta deskarbonizazioa eta erregai berriztagarrien garapena bultzatzeko proiektuak sustatzen jarraitzen duela.
.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta