SEN Servicios Ecologicos Navarra taldeak Gasteizko Hierros Ezquerro enpresa erosi du. Industria hondakinen (metala, plastikoa, papera, egurra…) kudeaketaz arduratzen da SEN, material horiek berrerabiliz, eta egoitza bana du Iruñean, Citruenigon eta Oionen.
Hierros Ezquerro Jundizko industria poligonoan kokatutako enpresa da, eta hondakinen kudeaketa du jarduera nagusi. Akordio honi esker, Gasteizko enpresaren 7.000 metro karratuko instalakuntzen jabe egingo da SEN, eta Hierros Ezquerroren bezero zorroa eta azpiegitura teknologiko guztia bereganatuko du.
"Bezero askok urteak zeramatzaten gure jarduera eremu honetara zabaltzeko eskatzen, egindako lan onarekin jarraitzeko eta gure zerbitzuaren kalitatea inportatzeko", azaldu du Alejandro Guindano SENeko presidenteak.
Orain arte Iruñea eta Oioneko lantegietatik eskainitako zerbitzua zabaldu nahi du SENek. Oiongo plantaren bidez, Errioxako merkatua du helburu eta erosketa berri honekin Araban duen posizioa indartu nahi du. Hala, SEN Vitoria markapean arituko dira Araban.
"Hain sektore heldu eta lehiakorrean, marjinak hain estu daudenean, eraginkortasuna lortu behar da. Lantegi berriari esker, %10eko aurrezpena izango dugu txatarren logistika arloan, zeinak inguruko bezeroei mesede egingo dien", azaldu du Guindanok.
Halaber, SENek jakinarazi du Iñaki Apiñaniz izango dela Gasteizko lantegiko arduraduna. Gasteizko Cortecubo enpresako zuzendari nagusia izandakoa da Apiñaniz. "Esperientzia handiko profila da, tokiko industria eta merkatua ondo ezagutzen ditu, eta kudeaketa hobetzen eta lurraldeko hazkundea ziurtatzen lagunduko digu", nabarmendu du Servicion Ecologicos Navarrako presidenteak.