• ENPRESAK GAUR
  • Iberpapelek irabaziak murriztu ditu, baina dibertsifikazioan egin du aurrera

Iberpapelek irabaziak murriztu ditu, baina dibertsifikazioan egin du aurrera

Konpainiak 2,2 milioi euro irabazi ditu ekainera arte, nahiz eta negozioak behera egin duen eta energia-kostuek gora

Konpainiaren fabrika Hernanin dago kokatuta | Argazkia: Iberpapel
Konpainiaren fabrika Hernanin dago kokatuta | Argazkia: Iberpapel
2025eko uztailaren 30a - 10:38

Iberpapelek 2,23 milioi euroko mozkin garbiekin itxi du urteko lehen seihilekoa, nazioarteko ziurgabetasunari eta eskaeren jaitsierari aurre eginda. Izan ere, konpainia egonkor mantendu da eta “dibertsifikazio estrategian aurrera egitea” lortu du.

 

Haatik, datu guztiak ez dira positiboak izan Hernaniko (Gipuzkoa) konpainiarentzat. Negozio zifraren zenbateko garbia 116,21 milioi eurokoa izan da, aurreko urteko epe berean (123,71 milioi) baino zertxobait gutxiago. Ebitda 8,93 milioikoa izan da, 2024an baino nabarmen txikiagoa (%49,6), diru-sarrera murritzagoen eta energiaren garestitzearen ondorioz.

Hala ere, enpresak normaltasunez eutsi dio jarduerari, martxotik apirilera bitartean aurreikusitako mantentze-lanen geldialdi teknikoa kontuan izan gabe. “Diziplinan, baliabideen optimizazioan eta egokitzeko gaitasunean oinarritutako estrategia baliozkotzen dugu”, adierazi dute konpainiatik.

 

Seihilekoaren ardatzetako bat arestian aipatutako dibertsifikazioa indartzea izan da. Industria-, enbalaje- edo etiketatze-aplikazioetarako paper-salmentak guztizkoaren %32,8 izan dira eta aurreko urtean, ordea, %28,4 izan ziren. Gainera, Iberpapelek zuntz birjinazko Kraft paper marroi berriaren proba industrialak amaitu ditu, zeina gaur egun merkaturatze fasean dagoen.