Indeus Industriaren Euskal Plataformak urteko azken bilkura izan du gaur goizean Bilboko Azkuna Zentroan. Jon Ansoleagak (SPRI), Joseba Mariezkurrenak (Bizkaiko Foru Aldundia) eta Sonia Rodriguezek (Eusko Jaurlaritza) egin dute topaketaren ongietorria, eta horren ostean, parte-hartzaileek plataformaren zazpi urteko jarduna aztertu dute, egindako bidean oinarrituta etorkizuneko norabidea zehazteko. Horrez gain, talde-dinamika baten bidez jaso dira bertaratutakoen ekarpenak.
Bigarren zatian hiru aurkezpen egin dira, arlo desberdinetako ekimen berriak ezagutzera emateko helburuarekin. Lehenik, Katea Legaiako Jaione Zubizarretak eta Patxi Gonzalezek enpresan garatu duten Harrera Planerako gida azaldu dute, aniztasuna ardatz nagusi hartuta. Ondoren, HiTz zentroko Aitor Soroak Latxa hizkuntza eredua eta sortu berri duten euskarazko txatbota aurkeztu ditu, azpimarratuz tresna horiek “euskararen erabileran jauzi kualitatiboa egiteko aukera” ematen dutela. Azkenik, Sorlandeko Ioar Oteizak eta Peru Arrasatek, Oraiko Iñaki San Vicenterekin batera, Markai tresna plazaratu dute, “edozein markaren inguruan hedabide digitaletan sortzen den irudia denbora errealean aztertzen duen tresna aurreratua”.
Indeusekoek azaldu dutenez, gaurko lan saioan plazaratu diren ideietatik abiatuta definituko dira datorren urtean jorratuko diren erronkak. Indeus ekimena Spri-Enpresen Garapenerako Agentziak, Energiaren Euskal Erakundeak, Eusko Jaurlaritzako Hizkuntza Politikako Sailburuordetzak eta Arabako, Bizkaiko eta Gipuzkoako foru aldundiek bultzatzen dute, eta euskaraz lan egitea hautatu duten industria-enpresei laguntzea du helburu. Urteotan, euskararen presentzia txikiagoa duten enpresek ere batu ahal izan dute, besteek egindako bidea eredu gisa baliatuta. Guztira, 50 enpresa eta hainbat erakundek osatzen dute sare parte-hartzailea.