Eusko Jaurlaritzak baliorik gabe utzi du Biobizkaia, Biogipuzkoa eta Bioarabako zuzendaritzen eta langileen artean adostutako akordioa, ELAren arabera. Sindikatuak azaldu du langileek —Biogipuzkoakoek eta Biobizkaiakoek soilik— epaitegietara jo zutela 2022ko Zientzia Legea aplikatzea eskatzeko, eta prozesu judiziala martxan zegoela, bioinstitutuetako zuzendaritzek akordio proposamen bana aurkeztu zutela. Langileen batzarrek proposamenak onartu zituzten, baina Jaurlaritzaren onespena falta zen indarrean sartzeko.
ELAk salatu du Jaurlaritzak ez duela akordioa babestu eta horrek langileen eta zuzendaritzen artean lortutako adostasuna bertan behera utzi duela. Sindikatuaren ustez, egoera hori onartezina da, eta adierazi du ezin dela onartu "legea ez betetzea" eta langileen lana behar bezala ez aitortzea.
Bioaraba, Biobizkaia eta Biogipuzkoako bioinstitutuetan 600 bat lagunek egiten dute osasun arloko ikerketa, besteak beste minbizia, esklerosia eta alzheimerra aztertzen. Langile horiek Osakidetzaren menpeko erakundeetan aritzen diren arren, ez dira Osakidetzako langileak, eta ondorioz lan baldintza okerragoak izaten dituzte. Zientzia Legeak, sindikatuaren esanetan, Osakidetzako antzeko kategorietako langileen baldintzak parekatzeko aukera emango lieke, batez beste %30 inguruko soldata igoerarekin, eta zenbait kategoriatan are hobekuntza handiagoekin.
Sindikatuak Eusko Jaurlaritzari eskatu dio jarrera aldatzeko eta akordioa gauzatzeko beharrezko urratsak emateko. Hori gertatzen ez bada, zuzendaritzei akordioa betetzea eskatuko diela jakinarazi du, eta, bitartean, aurkeztutako demanda judizialekin eta mobilizazioekin jarraituko duela ohartarazi du, bioinstitutuetako langileen lan baldintzak Osakidetzakoen parekoak izan arte.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta