JD.comek, Txinako merkataritza elektronikoko plataforma nagusietako batek, MediaMarkt eta Saturn enpresen %57,1 erosi du aste honetan. 2.500 milioi euroko balioa du eragiketak, eta Txinako enpresa teknologiko batek Europako merkatuan bete-betean sartzeko egin duen apusturik handienetako bat da. Jokaldiak kapitulu berri bat aurreratzen du merkataritza elektronikoaren guda globalean.
JD.com —bere jatorrizko Jingdong izenarekin ere ezaguna dena— Asiako online merkataritza potentzia handienetako bat da. 1998an sortu zen eta Pekinen du egoitza. Alibabaren lehiakide zuzena eta erreferentziazko eredua bihurtu da, kate logistikoaren gaineko erabateko kontrola izanda. Beste plataforma batzuetan ez bezala, JD.com ez da soilik saltzaile eta erosleen arteko bitartekari gisa jardutera mugatzen; bere biltegiak, garraioa eta entregak kudeatzen ditu, logistika eraginkorra eta fidagarria mantentzea ahalbidetzen dioten teknologia aurreratuak aplikatuta. Bere berrikuntzarik ezagunenen artean nabarmendu daitezke eskaerak prestatzen dituzten robot autonomoak, Txinako landa-eremuetan entregak egiten dituzten droneak edo ibilbideak eta denborak optimizatzen dituzten adimen artifizialeko sistemak. Domeinu teknologiko horrek abantaila lehiakorra eman dio, eta orain Europara eraman nahi du. Bertan, munduko merkaturik zorrotzenetako batean, Amazonen lidergoa lehiatzeko aukera ikusten du.
JD.com ez da soilik saltzaile eta erosleen arteko bitartekari gisa jardutera mugatzen; bere biltegiak, garraioa eta entregak kudeatzen ditu
Iragarritako eragiketak MediaMarkt eta Saturn elektronika-kateak kontrolatzen dituen enpresa-multzo alemaniarraren %57,1 erostea suposatzen du. 2.500 milioi eurotik gorako inbertsioari esker, JD.comek taldearen kontrol eraginkorra izango luke eta denda fisikoen sare zabala erabiliko luke kontinentera sartzeko. Guztira, MediaMarktek 1.000 denda baino gehiago ditu Europako 13 herrialdetan banatuta, eta presentzia nabarmena du Hego Euskal Herrian, sei establezimendu baititu funtzionamenduan.
Oraingoz, konpainia txinatarrak ziurtatu du ez dela egiturazko aldaketarik izango epe laburrean. MediaMarkten Düsseldorfeko egoitza nagusia eta egungo langile eta saltokiak mantenduko dira. Hala ere, epe ertainera, JD.com Asian erreferente bihurtu duten soluzio teknologikoak eta logistikoak pixkanaka integratzea aurreikusi da.
Txinako formula, Europara?
JD.comen nazioarteko hedapena ez da berria, baina orain arte kontu handiz egin du aurrera Asiako hego-ekialdean edo Latinoamerikan. Europa erronka handiagoa da, baina baita aukera erabakigarria ere: Amazonek hegemonia sendoa ezarri duen lurraldeetako bat da, baina ez kritikarik gabe eta hobetzeko tarterik gabe. JD.comen sarrerarekin, agertokia alda liteke.
MediaMarkten aldeko apustuak ikusgarritasuna eta berehalako presentzia emateaz gain, JDcomi bere eredu hibridoa hedatzeko aukera ematen dio, denda fisikoak online salmentarekin eta logistika integratuarekin konbinatzen dituena. Planteamendu hori oso eraginkorra izan da Txinan, batez ere tarteko hirietan eta landa-eremuetan, non entrega-azpiegitura funtsezkoa den.
Txinako merkataritza elektronikoko enpresa batek Europako merkatuaren bihotzean sartzeko eta Amazonekin baldintza berdinetan lehiatzeko egin duen ahaleginik handiena da
Konpainia txinatarrak formula hori errepikatu nahi du Europan, dendan biltzea, entrega arinak, zerbitzuaren pertsonalizazioa eta erosketa-prozesuaren automatizazioa errealitate izango diren ekosistema bat garatuz. Gainera, JD.comek hori egiteko gaitasun teknologikoa eta finantzarioa du: 2023an 150.000 milioi dolarretik gorako fakturazioa lortu zuen, eta NASDAQen zein Hong Kongeko burtsan kotizatzen du.
JD.comek Ceconomyren eta, horrekin batera, MediaMarkten kontrola eskuratzeko duen asmoa finantza-eragiketa bat baino askoz gehiago da. Txinako merkataritza elektronikoko enpresa batek Europako merkatuaren bihotzean sartzeko eta Amazonekin baldintza berdinetan lehiatzeko egin duen ahaleginik handiena da. Dagoeneko ezarrita dagoen denda-sarea, marka ezagun baten eta logistika teknologikoki aurreratu baten bidez, JDcom-ek retailaren etorkizuna birdefinitu nahi du Europan.