Oronaren Errektore Kontseiluak Aitor Azkarate orain arteko zuzendari nagusia kargugabetu du, zuzendaritzan ia hiru urte egin ostean. Organo exekutiboak euren bazkideei jakinarazitakoaren arabera, hartutako erabakiaren atzean daude Azkarateren "zailtasun nabariak" proiektu sozioenpresarialaren inplantazioari dagokionez. Antza, orain arteko zuzendari orokorra bera bat dator ikuspegi horrekin.
Errektore Kontseiluaren erabakia Oronak bere administrazio kontseilua egin eta hilabetera iritsi da. Batzarrean jakinarazi zenez, Oronak emaitza positiboekin itxi zuen 2023a, langile kopurua handituz —6.111raino, eta fakturazioaren %12,6ko igoerarekin, 1.009 milioi euroraino. Halaber, orduan iragarri ziren datozen sei urteetarako helburuak: 2030erako 1.200 milioi euroko salmentetara iritsi nahi du igogailu enpresak, eta 7.000 langileko langara iritsi. Joan den asteartean, planaren berrikuspen estrategikoa egin ostean, kontseilu errektoreak erabaki zuen Azkaratek zailtasunak izan zitzakeela helburu horiek betearazteko. Hala, Oier Lizarazuk ordezkatuko du karguan.
Lizarazuk Berrikuntzako ingeniari bezala eman zituen lehen pausoak Oronan, eta ondoren presidente izatera iritsi zen. Iaz Iker Argotek ordezkatu zuen karguan, eta geroztik Hernani eta Gasteizko planten zuzendari nagusi lanetan izan da.
Hala ere, aipatzekoa da Lizarazuren lehendakaritzapean irten zela Orona Mondragon taldetik, eta oraindik presidente zela onartu zirela kooperatiba talde erraldoietik kanpo Hernaniko enpresak izango zituen estatutu berriak, zehazki, 2023ko batzarrean. Airean geratu zen, baina kooperatibaren barne erregelamendua ere eztabaidatu eta onartzea. Azken pauso hori 2024ko apirileko administrazio kontseiluan eman zen.