Grafik 2006. urtean osatutako kooperatiba da, 1996an sortutako proiektu sortzaile baten jarraipena; beti diseinua eta komunikazioa epizentro izan duelarik. Pentsamendu estrategikoan oinarritutako irtenbideak diseinatzen dituzte, proiektuaren kudeaketa osoa eskainiz. “Gure lan nagusia bezeroaren beharrak zein diren ulertzea da, eta, beharrezkoa bada, bezeroaren ikuspegia eta helburuak zein diren hausnartzeko prozesuan laguntzea”, adierazi du Aitor Basterrak Grafikeko bazkideak. Zailena eta funtsezkoena den lehen urrats horretara iritsitakoan, gainerakoa lan teknikoko prozesu bat da, eta bezero bakoitzari bere beharretarako irtenbide egokia bilatzen saiatzen dira.
“Gu ez gara errotuloak, seinaletika, irudi korporatiboa edo produktuak bakarrik saltzen dituen enpresa bat; guk komunikazio soluzioak asmatzen ditugu identitatearen, espazioen edo korporazio produktuen arloetan”, argitu du Miren Goitia bazkideak. Hori da, hain zuzen ere, enpresaren filosofia; bezero bakoitzaren beharretarako irtenbide zehatzak bilatzen dituzte. Gainera, beharrak desberdinak izaten dira, hartara, baita konponbideak ere.
Diseinua ardatz gisa
Laudioko (Araba) kooperatibaren zeregin guztiak betetzen dituen ardatza da diseinua, eta hiru lan eremuetara hedatzen da: irudi korporatiboa, errotulazioa eta seinaletika eta produktu korporatiboa.
Enpresa txikia da, eta, ondorioz, hiru arloak elkarrekin komunikatuta daude; gainera, malguak direnez, hiru arloak uztartutako proiektuak egin ditzakete, baita bi edo bakarra ere. Esan bezala, bezeroaren beharrek baldintzatzen dute hori guztia. Haien lan egiteko modua bezeroari laguntzea da, haren beharrak ulertuz, eta, hortik abiatuta, haren komunikazio premietara eta aukera ekonomikoetara egokituko diren konponbideak bilatuz.
Miren Goitia: “Gu ez gara errotuloak, seinaletika, irudi korporatiboa edo produktuak bakarrik saltzen dituen enpresa bat; guk komunikazio soluzioak asmatzen ditugu identitatearen, espazioen edo korporazio produktuen arloetan”
“Zaila da proiektu bat aukeratzea, esan dugun bezala, gure lanak beti desberdinak dira, bezero bakoitza desberdina baita”, esan du Basterrak. Badituzte lanak hasieratik jorratzen dituztenak, hau da, diseinuarekin hasten dira eta gero modu naturalean proiektu horren espazioa txukuntzen hasten dira, seinaletika ezartzen, kanpo eta barne errotulazioa garatzen, eta behar izatekotan, promozio materialak sortzen.
Kooperatiba gisara eratu ziren haien lan egiteko modura hoberen hurbiltzen zen eredua zelako. Talde lana oso garrantzitsua da Grafikentzat, eta guztiek maila berean laguntzen dute beharren arabera. Grafik Sarea bezala, ia 20 urteko ibilbidea egin dute, eta une txarrak saihestu dituzte, hala nola 2008ko krisia edota pandemia, eta komunikazio proiektu egonkor bat finkatzea lortu dute, proiektu garrantzitsuak eta interesgarriak aurrera eraman dituena.
2024an ia milioi bateko fakturazioa
Une honetan, ahal duten neurrian, haien funtsekin finantzatzen saiatzen dira, baina noizean behin inbertsio berriei aurre egin behar diotenean, hau da, makina berriak, ibilgailuak… kanpo finantzaketa eskatzeko beharrean egoten dira.
Iaz, ia milioi bat euroko fakturazioa izan zuten, eta, aurten, bost hilabete igarota, iazko fakturazioa errepikatu dezaketela uste dute. “2008az geroztik, krisialdi batetik ateratzen garen guztietan, hurrengoa datorkigu, eta, horrekin batera, beldurra”, aitortu du Goitiak. Beraz, ez dakite nola eragin diezaiekeen Estatu Batuetan hasitako merkataritza gerrak.
Sektorearen ziurgabetasuna
Grafik-en funtsezko lan ildoa diseinu grafikoa da, beraz, zerbitzu enpresa bat dira. Basterraren arabera, sektorearen egoera, egun, zalantzazkoa da. Nahiz eta egiaztatu bezeroek gero eta sentsibilitate handiagoa dutela diseinuarekiko eta diseinuak komunikatzerakoan duen garrantziaz jakitun izanik, ikusten dute adimen artifizialaren etorrerarekin sektorea abiadura handiz aldatzen ari dela, eta une honetan ez direla gai esateko zein norabidean. “Beraz, hitza ziurgabetasuna litzateke”, dio Basterrak.
Aurten proiektu garrantzitsu bat dute sinatuta Bermeoko Udalarekin, Gaztelugatxeko Interpretazio Zentroaren eduki museistikoa egiteko. Era berean, Loraldiaren irudia eta euskarri grafikoak garatzen jarraitzen dute, eta baita KOT arropa-markaren diseinuak eta ekoizpenak garatzen ere.
KOT jantzi markaren 30. urteurrena
Grafik Sarea osatzen duten pertsonen kolektiboak haien ingurunea aitortu eta gizarte bidezkoagoa, askeagoa eta berdintasunezkoagoa batean parte hartzeko konpromisoa dute. Helburu sozial bat ere badute: aholkularitza eta nortasun kooperatiboa diseinatzeko eta komunikatzeko proiektuak garatzea, espazioak eta seinaleak diseinatzea eta korporazioa produktua diseinatzea.
Grafik Sarea osatzen duten pertsonen kolektiboak haien ingurunea aitortu eta gizarte bidezkoagoa, askeagoa eta berdintasunezkoagoa batean parte hartzeko konpromisoa dute
Goitiaren arabera, bi erronka nagusi dituzte. Alde batetik, gertatzen ari diren aldaketa teknologikoei aurre egitea, adimen artifizialaren ezarpenak eragindako aldaketei bereziki. Eta, beste aldetik, epe ertainera, eta, barne ikuspegitik, kolektiboaren barruan emango diren lehen erretiroak eta horrek ekarriko duen belaunaldi aldaketa prestatzea.
Epe motzera ere badute eginkizun polit bat; KOT, haien jantzi markak 2026an 30 urte beteko ditu, eta behar den bezala ospatuko nahiko lukete, markari sostengua ematen, haien inguruan egon diren guztiak eskertuz, bai dendak (batzuk hasieratik haiekin egon direlako) eta bai azken bezeroak, familiak eta lagunak ere.