Aurreikuspenen arabera, 2026rako martxan izango da Biscay Eco Aggregates lantegia, Bilboko Portuko AZ1 kaian kokatuko dena. Petronor eta O.C.O Technologyren artean sortzen ari diren fabrikak eko-agregakin sintetikoa ekoitziko du, zeinak agregakin naturala ordezkatzeko balioko duen.
Eraikuntza material gisa erabiltzen den agregakin sintetikoa egiteko, errausketarako hondakinak eta instalazio berriak harrapatutako CO2 erabiliko dira; gainera, agregakina behin sortuta dagoenean ere gai izango da CO2 gehiago harrapatzeko. Hala, proiektuari esker hondakinak zein isurpenak murriztuko dira, zabortegietara eramango lituzketen zaborrak tratatuko dituelako.
Europa kontinentalean agregakin sintetikoak fabrikatuko dituen lehen industria proiektua da Petronorrena, zeinak akzioen %75 izango dituen. Lehen fasea jada gauzatuta dago, 2024ko bigarren seihilekoan hasi baitziren eraikuntza lanekin, eta bigarren fasea ere martxan da. Gainera, jakinarazi dutenez Kutxabankek proiektua babestuko du 11,5 milioi euroko maileguaren bitartez.