Saint Gobain konpainiako enpresa batzordeak astelehen honetan salatu duenez, zuzendaritzak Berriobeitiko lantokiko jarduera geldiarazi nahi du, eta horrek 45 langile jarriko lituzke arriskuan. CCOO sindikatuak komunikatu batean zehaztu du instalazioak ez liratekeela guztiz itxiko, jarduera komertzialak martxan jarraituko lukeelako.
Enpresak lehiakortasunaren galera argudiatuta justifikatu du hartutako erabakia, eta ekoizpena Europako beste lantegi batzuetara eramateko asmoa duela erakutsi du. Sindikatuaren ustez, “deslokalizazio kasu argia” da, eta, beraz, negoziazio prozesu bat ireki da orain konpainiarekin.
Enpresa batzordeak, UGT, CCOO, ELA eta LABeko delegatuek osatuak, ekoizpenaren itxieraren aurkako “erabateko” gaitzespena adierazi du eta zuzendaritzari presioa egiteko mobilizazio egutegi bat prestatzen ari direla iragarri du. Aldi berean, Nafarroako Gobernuari bitartekari gisa esku hartzeko eskatu dio batzordeak, beren ustetan “Nafarroako industria-sarearentzat zartako berri bat” ekarriko lukeen erabakia geldiarazteko asmoz.