Ternua Groupek teknologia inbertsioak egin ditu Etxalarren duen lantegian, Lorpen markako produktuak egiten dituenean, ekoizpen ahalmena %30 handitu ahal izateko. Jatorri italiarreko zortzi ehuntze makinatan egin du inbertsioa, hazten jarraitu ahal izateko. Makina berria instalatuta eta errendimendu betean dago jada. Hala, galtzerdiak egiteko gaitasuna urtean milioi bat pare baino gehiagokora igotzea espero dute. Izan ere, Nafarroako lantegia larruazalarekin kontaktuan dauden jantzi funtzionalen jantzigintza aurreratuan eta ekoeraginkorrean espezializatuta dago, josturarik gabe egiten dituen jantzietan.
2022an, Etxalarko lantegiak 3 milioi euro fakturatu zituen, taldearen diru sarreren %10 inguru, baina, inbertsio berriarekin, fakturazio hori urte honetan bertan 4 milioi eurora igotzea espero dute.
Halaber, ekoizpen baliabide berrietan inbertitzeaz gain, lantaldea 47 pertsonaraino handitu du, ekoizpenaren kudeaketa funtzioak eta plantako langileak betetzeko. Urte honetan bertan, taldeak fabrikaren ingurua urbanizatuko du, eraikuntza material jasangarriekin eta Pirinioen oinean kokatuta dagoen inguru naturalera egokitutako zuhaitz landaketarekin. “Kontsumitutako energia elektrikoaren %100 jatorri berriztagarrikoa da”, adierazi du taldeak.
Aurrerago begira ere egin ditu taldeak aurreikuspenak. Hala, 2026rako ekoizpen propioko jantzien salmentak %20ra hurbilduko lirateke, eta 5 milioi eurotik gorako fakturazioa izango lukete.
Kontuan izan behar da, hala ere, lantegiaren urteko produkzioaren %20 inguru hirugarrenentzat dela, besteak beste, Forum Sports, Bever edo Ametrine bezalako bezeroentzat.