Ternua Groupek borondatezko hartzekodunen konkurtsora doa. Ternua, Astore, Lorpen eta Loreak Mendian markak biltzen dituen konpainiak Donostiako Merkataritza Arloko 2 zenbakiko Epaitegian aurkeztu du konkurtsoa, eta ohar bidez azaldu du ehungintzaren sektoreak mundu mailan bizi duen egoera “kritikoak” kalte handia eragin diolako hartu behar izan duela erabakia.
Arrasaten (Gipuzkoa) egoitza duen konpainiak 29,2 milioi euroko fakturazioa izan zuen iaz, emaitza negatiboa, eta 16 milioi euro zorra du pilatuta. Arrasateko egoitzaz gain, fabrika bat du Etxalarren (Gipuzkoa) eta beste 28 saltoki ere bai. Egun, 180 langile ditu.
2023tik egoera “zailean” zegoela adierazi du Ternua Groupek. Oharrean ere argitu dute, azken unera arte, eta hartzekodunen konkurtsoari heltzeko erabakia hartu baino lehen, Ternua Group-eko zuzendaritza harremanetan egon dela jarduerari eta enpleguari jarraipena emateko eta ekoizpen-unitateren bat eskuratzeko interesa izan zezaketen inbertitzaile posibleekin negoziatzen aritu dela.
Zorra birfinantzatzen saiatu badira ere, ez dute hartzekodunen konkurtsoa ekiditea lortu. Dena den, Ternua Group barruan dagoen Loreak Mendian markak eskaintza bat jaso duela argitu dute, bere jarduerarekin jarraitzea ahalbidetuko liokeena. Eskaintza honi erantzuteko hilabeteko epea du Donostiako epaitegiak.