Mungiako TH Companyk 60 urte bete ditu

TH Companyk 60. urteurrena ospatu du gaur Mungiako instalazioetan. 1966an herri horretan sortutako enpresak bertan ditu oraindik egoitza nagusia eta erabakiak hartzeko zentroa. Ospakizunean erakundeetako, enpresa-munduko eta industria-sektoreko ordezkariak bildu dira, konpainiaren ibilbidea eta haren garapenean parte hartu dutenen ekarpena aitortzeko.

Gaur egun, TH Companyk 250 langile ditu, bederatzi filial eta ordezkaritza, eta 20 herrialde baino gehiagotan saltzen ditu produktuak. Fakturazioaren %80 baino gehiago nazioarteko merkatuetatik dator. Bi negozio-arlo nagusi ditu: Marco, arrantza- eta itsas sektoreko makinerian eta sistemetan espezializatua, eta TH, meatzaritzarako, industria-mineraletarako eta hondakinen kudeaketarako ekipamenduak eta instalazioak garatzen dituena. Konpainiaren datuen arabera, Marcok mundu osoko 500 atun-ontzi baino gehiagotan instalatu ditu teknologiak, eta merkatu-kuotaren %70 hartzen du segmentu horretan.

Berrikuntza ere enpresaren jardueraren parte da. Novattia I+Gko filialaren bidez, solidoen tratamenduan eta industria adimendunerako soluzioetan lan egiten du taldeak. SBS enpresak (TH Company taldeko konpainia), berriz, hondakinak balioztatzeko eta CO2 harrapatzeko HECO teknologia garatzen du. Arrantza-arloan, eraginkortasun handiagoko sistema hidraulikoak eta eragintza elektrikoa duten ekipamenduak sustatzen ditu.

Ospakizunean, Elixabete Etxanobe Bizkaiko ahaldun nagusiak talentua erakartzearen eta enpresak lurraldean errotuta mantentzearen garrantzia nabarmendu du. Haren hitzetan, bi alderdi horiek funtsezkoak dira Bizkaiaren etorkizun industriala bermatzeko, enplegua eta aberastasuna sortzen jarraitzeko eta ongizate-estatuari eusteko. Gonzalo Prat TH Companyko gerenteak ere enpresaren garapenean parte hartu duten langileak, bezeroak, hornitzaileak eta erakundeak eskertu ditu, eta arrantzaren eta meatzaritzaren sektoreetan ez ezik, hondakinen balioztatzean eta energia-eraginkortasunean ere aurrera egiteko asmoa azaldu du.