Ez dira garai onak Tubos Reunidosentzat, eta are gehiago okertu dira muga-zergen gerra hasi zenetik. Soldadurarik gabeko tuboak egiten dituen enpresa euskaldunak altzairuaren eta aluminioaren gainean ekainetik ezarri duen %50ko muga-zergek bezeroen erosketa eta inbertsio erabakietan eragin dute, horiek gelditu egin baititu.
Taldearen EBITDAk 0,7 milioi euroko emaitza negatiboa izan du urteko lehen seihilekoetan, iazko epe berean 5,3 milioi euroko hazkundea izan ostean. Gauzak horrela muga-zergek Tubosen EBITDAn izan duten eragina 15 milioi euroan kokatzen da.
Testuinguru hori izanik ere, lehen seihilekoko negozio zifra %19 hazi da urtarriletik ekainera, aurreko urteko seihileko berarekin erkatuz gero, 205,8 milioi euroan kokatzeraino. Horretarako gako izan da 2024an eskaera-zorroak gora egin izana. Hala ere, balioa aintzat hartuz gero, eskaera-zorroaren bolumena %26 jaitsi da.
Emaitzak abiapuntu, hainbat neurri hartu ditu Tubos Reunidoseko zuzendaritza taldeak. Bata, merkatu osagarrietako jarduerari bultzada ematea, eta bestea, kostuei eusteko politikak eta neurri operatiboak hartzea ekoizpenaren eraginkortasuna sustatu asmoz. Iruña Okako TRPTko plantan aldi baterako erregulazio espedientea abian jarri du.