Tubos Reunidosen Amurrioko (Araba) eta Trapagarango (Bizkaia) lantegietako enpresa-batzordeak Trapagaranen elkartu dira, enpresak iragan ostiralean iragarritako enplegu-erregulazioko espedienteari (EEE) nola erantzun erabakitzeko. Helburua zuzendaritzarekin egingo duten hurrengo bilerara, otsailaren 9kora, jarrera bateratuarekin joatea izan da. Goizeko hamarretan hasitako bileran estrategia komun bat adostea izan dute ardatz, espedienteak bi lantokiei eragiten dien arren, enpresak EEE bakar gisa negoziatu nahi duelako. Ondorioz, batzordeek uste dute koordinazioa funtsezkoa izango dela negoziazioetan indar handiagoa izateko.
Langileen ordezkariek azaldu dutenez, oraingoz ez dute espedienteari buruzko informazio zehatzik jaso, enpresaren iragarpenetik eta ostiralean zuzendaritzarekin egindako bileratik harago. Hori dela eta, ziurgabetasuna nagusi da oraindik. Hala ere, sindikatuetako ordezkariek ohartarazi dute indarrean dagoen legediak EEE batek gutxienez langileen %10i eragitea eskatzen duela, eta horrek Tubos Reunidosen kasuan gutxienez 130 kaleratze ekarriko lituzkeela. Batzordeen esanetan, kopuru hori “oso handia da”, eta kezka handia sortzen du plantillan.
Oraingoz, otsailaren 9ra itxaron beharko dute langileek, orduan enpresak Bideragarritasun Planaren neurriak aurkezteko asmoa duelako. Tubos Reunidosek azaldu du neurri horien xedea industria-jarduerari eta enpleguari eustea dela, ahalik eta eragin sozial txikiena izatea helburu.
