FEI Finantzen Euskal Institutuak eta Ulma Taldeak hitzarmena izenpetu dute gaur. Horren baitan, FEIk euskal talde kooperatiboan inbertsio-planari bultzada emango dio 10 milioi euroko finantzaketarekin. Plan horren baitan jasotzen dira, besteak beste, material jasangarriak fabrikatzeko instalazio baten eraikuntza proiektua eta fabrikazio-teknologia aurreratuen sorrera, azken horrek ahalbidetuko baitu energia-kontsumoa murriztea, produkzio-prozesuak optimizatzea eta horien energia-efizientzia indartzea. Hala, bederatzi kooperatibak osatzen duten taldeak beste pauso bat eman nahi du jasangarritasunari dagokionez.
Finantzaketa hitzarmen hori ez da azkenaldian ULMA Taldeak sinatu duen bakarra. Izan ere, ICOrekin eta Europako Inbertsio Bankuarekin beste batzuk izenpetu ditu orain gutxi. Finantzen Euskal Institutuari dagokionez, adierazi behar da Eusko Jaurlaritzak sortutako tresna bat dela, eta bere eskumenen artean dago enpresei kreditu publikoa eskaini ahal izatea, arestian aipaturiko kasuan bezala.