Ayesa erosteko eragiketan parte hartzeko aukera aztertzen ari da Vital Fundazioa, Kutxa Fundazioak euskal partzuergoarekin bat ez egitea erabaki ostean. Arabako fundazioaren ekimena EAJren eta Elkarrekin Podemosen babesarekin onartu da, boto bakarreko aldearekin, eta helburua lurraldean 500 lanpostu teknologiko inguru finkatzea eta sektore estrategiko batean posizionamendua indartzea da.
Ayesak 13.000 langile ditu mundu osoan eta aholkularitza teknologiko handien artean dago, digitalizazioan, konputazioan eta zibersegurtasunean espezializatuta. Erosketa gauzatuz gero, Donostiako Ibermática dibisioa EAEra itzuliko litzateke, eta partzuergoak urte amaierara arteko epea izango du operazioa ixteko eta bazkide berriak sartzeko. Etorkizuneko egoitzaren kokapena, Zamudio edo Donostia artean, eta enplegu teknologikoaren lurralde-banaketak erabakigarriak izango dira.