Datorren ostiralean, irailaren 2an, ez da produkziorik izango Landabenen. Bederatzigarrenez aurten. Hala jakinarazi dio zuzendaritza jarraipen batzordeari. Antza, direkzio zutabeak eta abiadura kaxak falta dira, ibilgailuak egiteko ezinbestekoak, eta, ondorioz, ekoizepena eten beharko dute. Langileak aldi baterako erregulazio espedientean jarriko ditu enpresak egun horretan. Astelehenetik ostegunera, ordea, hiru txanda izango dira.
Etenaldiaren berri emateaz gain, zuzendaritzak adierazi dio batzordeari egoera "oso ezegonkor" dagoela. Are gehiago, "auto osatugabeak" egiten aritu dira. UGTk esandakoaren arabera, 9.000 auto izan dira gutxi gora behera. Aipaturiko ibilgailuei MIBak falta omen zaizkie, besteak beste, mugikorren konektibitatea eta nabigazioa kontrolatzeko osagaia, eta Landabenen, Irañetan (Nafarroan) eta Santanderren gorde dira.