Frantziako hauteskundeek esperotako emaitza eman dute. Macronek Le Pen garaitu du. Sorpresarik ez, hortaz. Merkatuek, ordea, ez dute atsedenik hartzen, eta albiste, aurrikuspen eta emaitzez lepo datorren asteari ekin diote.
Interes tasen igoera noizko?
Interes tasen gorakadaren inguruko apustuak puri-purian daude. Atzo bertan Christine Lagarde Europako Banku Zentraleko presidenteak moneta politikoa noiz eta nola aldatuko duen argitzen lagundu zuen. 2022ko hirugarren hiruhilekoaren hasieran aktiboen erosketa bukatzea aurrikusi du. Ondoren, interes tasak igotzea aztertuko du. Amerikako Estatu Batuetan, berriz, Jerome Powell Erreserba Federaleko buruak onartu du mahai gainean dagoela maiatzerako tasak 50 puntutan igotzeko aukera. Badaude bere adierazpenetan, baina, kezkatzeko arrazoiak. Izan ere, inflazioa kontrolatzeko tresnak tentuz erabiltzen saiatuko zela esan zuen, ekonomia ez moteltzeko. Zeharka bada ere, Powellek onartu egin zuen tresnak zuzen erabili ezean, atzeraldirako arriskua dagoela.
Europan kezka dago interes tasen gorakadak ekonomian izango duen eraginagatik, batez ere estatu askok duten zorpetze maila altua ikusita. Familiei dagokienez, apirilaren bukaeran Euriborraren hileko batez bestekoa ezagutuko dugu, hipoteka mailegu gehienetan erabiltzen den erreferentzia. Urte luzez negatiboan egon eta gero, tasa positiboetan sartu da eta horrek familien ekonomiei esfortzu gehigarria egitea ekarriko die. Asteazken honetan EBZko buruak beste agerraldi bat egingo du, baina ez da sorpresa handirik espero.
Ekonomiaren sendotasuna
Asteak ekonomiaren osasuna aztertzeko hainbat datu utziko ditu. Gaur bertan Alemaniako enpresarien konfiantzaren datua ezagutuko da. Ukrainako gerrak eta inflazio altuak Europako lehen ekonomiaren joera markatuko dute. Kontsumitzaileen konfiantzaren datuak ere ezagutuko ditugu. Asteartean AEBtakoa; Europako datuak, berriz, tantaka ezagutuko ditugu astean zehar, eta ostegunean kontinente zaharreko datu metatuak.
Inflazioaren goranzko joera mantenduko ote den ezagutuko dugu ostegunean, eta egun berean ikusiko dira Espainia eta Alemaniako KPIak. Ostiralean, aldiz, Frantziakoak eta Europa osokoak. Aurrikuspenak ez dira onak, eta estanflazio hitza geroz eta ozenago entzuten da.
Ekonomiaren sendotasuna azaltzen duen Barne Produktu Gordinaren datuak ere ezagutuko ditugu ostiralean, Eurogunekoak zein herrialde bakoitzekoak. Lan merkatuaren berri ere izango dugu. Espainiako langabezi tasa, ordea, egun bat lehenago argitaratuko dute, ostegunean.
IBEXeko euskal enpresen lehen hiruhilekoko emaitzak
Burtseei dagokienez, aste honetan IBEXeko enpresa nagusiek lehen hiruhilekoko emaitzen berri emango dute. Euskal enpresei dagokienez, ikusteko dago CIE Automotive taldearen emaitza. Ukrainako gerrak burtsan sufriarazi du enpresa bizkaitarra: urtea hasi zenetik, bere kotizazioa % 28 jaistera heldu zen, baina azken aste honetan galdutakoaren zati bat berreskuratu du. Ostegun honetan lehen hiruhilekoko emaitzak aurkeztuko ditu, eta ostiralean akziodunen biltzarra burutuko du Bilboko Euskalduna Jauregian.
Iberdrolak asteazkenean aurkeztuko ditu bere hiru hilabeteko emaitzak. Ikusteko dago argindarraren prezioa zuzentzeaz Espainiako Gobernuarekin dituen desadostasunei buruzko adierazpenik egingo ote duen. BBVAk ostiralean ezagutaraziko ditu bere emaitzak, eta Siemens Gamesak datorren astean egingo du aurkezpena, maiatzaren 5ean.