Jay Powell FED Amerikeako Estatu Batuetako Erreserba Federaleko buruak Wyomingo Jackson Holen honakoa adierazi zuen: “prest gaude interes tasak gehiago igotzeko beharrezkoa baldin bada inflazioa %2ra irmo jaisten ari dela ziurtatzeko”. Abuztu erdialde inguruan mundu mailako gobernuen bonuek azken hamarkadetan izan dituzken interes tasa altuenak erdietsi zituzten. AEBeko gobernuaren 10 urtetarako bonuak (treasuriak) %4,3ko langara iritsi ziren; Erresuma Batuko 10 urtetarakoak azken 15 urteetako maximoa lortu zuen. Alemaniakoak 2011an markatu zuen historikoa erdietsi zuen, azken asteetan zerbait beherantz egin badute ere.
Egon badaude baliozko ahotsak —esaterako, Bill Gross, Pimco gestoraren fundatzailea eta, mundu mailan, errenta finkoaz ia gehien dakien pertsonatzat hartzen dena— adierazi dutenak epe luzerako bonuen errentagarritasuna gehiago igo behar dela. Ez litzateke txorakeria izango; historikoki 1960ko, 1990eko eta 2000ko hamarkadetako momentu gehienetan errentagarritasun horietan (edo handiagoetan) mugitu ziren merkatuak.
Zer gertatzen ari da bonuekin?
Ez da inflazioaren kontua soilik. 10 urtetarako bonuen interes tasek bi osagai dituzte: bata, epe horretarako espero den inflazioa —horren adierazle inflaziotik babestuta dauden berme bonuak—, eta bestea interes errealak —inflazioa gainditu ostean aktibo horiek ematen duten interes gehigarria—. Egiturazko aldaketa bigarren osagai horretan ematen ari da. 2008an finantza krisi handia izan zenetik mantendu izandako interes erreal negatiboen aurrean %2ko interes erreal positiboak galdatzen ari dira 10 urtetarako gobernuetako zorrek.
Interes erreal positiboek gora egiteak bi arrazoi izan ditzake: krisi bat aurreikusten dute eta arrisku prima bezala jarduten dute, edo interes erreal horiei aurre egin diezaieken ekonomia erresilientean konfiantza adierazi dezakete eta, beraz, mundu mailako finantza krisiaren ostean bonuek ematen zuten errentagarritasuna (eskasa edo negatiboa) ez litzateke nahikoa izango.
Interes erreal positiboek gora egiteak bi arrazoi izan ditzake: krisi bat aurreikusten dute eta arrisku prima bezala jarduten dute, edo interes erreal horiei aurre egin diezaieken ekonomia erresilientean konfiantza adierazi dezakete
Merkatuek uste baino erresilientzia handiagoa dutela adierazten ari dira. Erreserba Federalari eta banku zentralei tasa altuak luzeagorako mantentzeko aukera ematen die. Merkatuak zuzen badabiltza eta ekonomia, uste baino indartsuagoa delako, atzeraldian sartzen ez baldin bada, interes errealen igoera egokia litzateke arrisku aktiboek izan dezaketen edozein arazo ekonomiaren indarrarekin konponduko liratekelako.
Japoneko Bankuaren erabakiak ere eragina izan du bonuen interesen igoera horretan. Bere interes tasen kontrol politika malgutzerakoan, 10 urtetarako bonuaren tasa %0,5etik %1era igo zen eta horrek suposatu du mundu mailako merkatuetan Japoneko Bankutik datorren diru kopurua gutxitzea (likidezia gutxitu) eta japoniarrek dirua atzerriko inbertsioetatik Japonera bueltatzeko pizgarria. Mundu mailan likidezia gutxiago izanda bonuek errentagarritasun handiagoa eskaini beharra suposatzen du.
Akzioen merkatuek
Teknologia enpresa erraldoiak (Zazpi Bikainak deituak; Apple, Microsoft, Alphabet –Google—, Amazon, Tesla, Nvidia eta Meta —Facebook—) S&P500 AEBeko burtsa indizeak 2023. urtean izan duen irabaziaren %88aren erantzule dira. Uda erdian aurtengo jaitsierarik handiena izan zuten, baina berriz aurreko baloretara bueltatzen ari dira. Aurtengo irabazien zatirik handiena ez dator izandako etekinetatik, baizik akzioen prezioen igoeretatik, hau da, enpresa horiek lortuko dituzten emaitzengatik inbestitzaileek multiplo gehiago ordaintzeko prest daudelako. Momentuz, eta abuztuko merkatuen ibilera ikusita, ez dirudi askoz gehiago ordaintzeko prest daudenik.
Analisten ustez etorkizun hodeitsua mantentzen da. AEBeko uztaileko ondasun iraunkorren eskaerak jaitsi egin ziren, eta zenbait erretailerrek irabazi makalagoak izan dituzte. APDk emandako enplegu pribatuko datuen arabera, abuztuan enplegu pribatu gutxiago sortu ziren AEBen.
Teknologia enpresa erraldoiak [...] S&P500 AEBeko burtsa indizeak 2023. urtean izan duen irabaziaren %88aren erantzule dira
Europan, Alemanian jarri behar da arreta. Municheko IFO institutuaren hileroko konfiantza inkestak erakutsi du lau sektore nagusietan (manufakturak, zerbitzuak, erretailerrak eta eraikuntza) konfiantza jaisten ari dela. Alemaniako ekonomiaren pandemia osteko errekuperazioa motelagoa izan da AEBeko eta euroguneko beste herrialdeekiko. Manufakturak izan duen atzeraldi bortitzak Alemaniako industria zabala gogor astindu du; eraikuntzan ere eskaerak %2,7 jaitsi ziren ekainean. Bundesbankek aurreikusten du Alemaniako barne produktu gordina %0,3 jaitsiko dela 2023an, eta 2024.erako %1,4 hasiko dela.
AXA IM kudeaketa etxearen ustez, euroguneak oro har bi erronka nagusiei aurre egin behar die. Bere hazkunde eredua esportazioek bultzatutako eredua izanda, AEBekin alderatuz, Txinaren eskaeraren moteltzeak kalte gehiago egiten dio. Bestaldetik, ozeano atlantikoaz bestaldeko bonuen merkatuarekin duen korrelazio handiagatik euroguneko interes tasen goranzko presio handiagoa inportatzen ari da AEBetik eta EBZaren gogortzearen talka larriagoa egiten du.
TAM etxearen ustez, aukera zoragarriak daude bonuak momentu honetan erosiz gero.