Frantziako Finantza Fiskaltzak herrialdeko bost bankuren (Societe Generale, BNP Paribas eta Exane, HSBC eta Natixis filiala) egoitzak miatu ditu, ustezko zerga iruzur larriagatik. Frantziako 16 magistratuk elkarrekin zuzendutako operazioa da, eta 150 ikertzaile baino gehiagok eta Alemaniako sei fiskalek parte hartu dute, Europako lankidetza judizialaren esparruan, Finantza Fiskaltza Nazionalak (PNJ) azaldu duenez.
Ustezko iruzurra urtero milaka milioi eurokoa izan liteke. Fiskaltzak azaldu duenez, zergak Frantzian ordaintzen dituzten enpresetako akziodun atzerritarrek, egoitza fiskala Frantziatik kanpo dutela aprobetxatzen dute dibidenduen gaineko zergak ez ordaintzeko.
PNJk azaldu duenez, dibidenduen ordainketa eguna iristear denean, egoitza fiskala atzerrian duten akziodunek Frantziako banku horiei ematen dizkiete beren tituluak aldi baterako. Modu horretan lortzen dute Frantziako Ogasunak egoitza fiskala atzerrian duten horiei ezarritako zergak saihestea. Izan ere, Frantziako bankuek dituzten akzioen dibidenduek ez dute ia zergarik ordaintzen. Behin zerga saihestuta, akzioen mailegu hori iraungi egiten da, eta jatorrizko akziodunari itzultzen zaizkio, zerga askoz gutxiago ordainduta. CumCum izenez da ezaguna zergak ez ordaintzeko teknika hori, lehendik ere ezaguna Alemanian, etengabeko eskandaluak eragin baititu bertan.
Alemaniaren kasuan, iruzurrak cum-ex izeneko eskema jarraitzen du, eta akziodunak dibidendu bat ordaindu aurretik saldu behar izaten ditu tituluak, ondoren kupoia ordaintzean itzultzeko. Horrela, nahasmena sortzen da enpresak dibidendua ordaintzeko unean benetako jabea nor den jakiterako unean, eta bi inbertitzaileei aukera ematen die dibidenduei aplikatzen zaizkien kapitalaren etekinen gaineko zergaren itzulketak erreklamatzeko, gainkargu horiek inoiz ordaindu ez izan arren.
Frantziako Fiskaltzaren arabera, ustezko iruzurraren berri 2018an eman zuten hasiera batean, eta 2021eko abenduan ireki zuten ikerketa, iruzur fiskal larriagatik. Ikerketaren berri izan ondoren, ikertutako bankuek burtsan jaitsierak izan dituzte: Société Générálek %1 inguru egin du behera, eta BNP Paribasek %0,4. HSBC oraindik eremu positiboan mantentzen da.